Biz ýakynlaşmagy ugur edinýäris

30-njy sentýabrda M.I.Rudomino adyndaky Bütinrussiýa Daşary ýurt edebiýaty döwlet kitaphanasynyň merkezi eýwanynda türkmen edebi dilini esaslandyryjy beýik şahyr – Magtymguly Pyragynyň ýädigärliginiň dabaraly ýagdaýda açylyşy boldy.

Ýädigärlik heýkeliň açylyş dabarasyna Türkmenistanyň Russiýa Federasiýasyndaky Adatdan daşary we Doly ygtyýarly Ilçisi Esen Aýdogdyýew, Daşary ýurt edebiýaty döwlet kitaphanasynyň Baş direktory Pawel Kuzmin, Russiýanyň Medeniýet ministriniň orunbasary Sergeý Perşin, Russiýa Federasiýasynyň Prezidentiniň Halkara medeni hyzmatdaşlyk boýunça ýörite wekili Mihail Şwydkoý, A.M.Gorçakow adyndaky gaznanyň ýerine ýetiriji direktory Leonid Draçewskiý we başgalar gatnaşdylar. Türkmenistanyň döredijilik wekiliýetiniň düzümine meşhur aýdymçylar Bahar Annaýewa, Gülşat Gurdowa, Atajan Berdiýew we beýlekiler girdi.

Zehinli heýkeltaraş Zahid Babaýewiň döreden ýadygärligi şahyryň we eseriniň düýp manysyny görkezýän nusgawy görnüşde ýasaldy. Bu taryhy waka ýagny türkmen şahyrynyň ebedileşdirilmegi Russiýanyň paýtagtynyň taryhynda ilkinji gezekdir.

Eserleri köp dile terjime edilen beýik akyldar we şahyr Magtymguly Pyragynyň şöhratly ýubileý ýylynda, türkmen halkynyň bu görnükli oglunyň adyny beýige geldyrmaga goşant goşanlaryň atlaryny minnetdarlyk bilen ýatlaýarys. Olaryň arasynda - şahyrlar A. Tarkowskiý, G. Şengeli, M. Tarlowskiý, S. Iwanow, Y. Gordienko, Ýu. Neýman, N. Grebnew we beýlekiler bar. Olaryň terjimeleri Magtymgulynyň ölmez-ýitmez pikirlerini rus dilli okyjylara ýetirdi.

Türkmenleriň birnäçe asyrdan bäri ýaşaýan Astrahan we Stawropol sebitlerinde Magtymguly ýadygärlikleri bar. Şahyr bir wagtlar Astrahandaöz yzyny galdyrypdyr, indem bolsa Russiýanyň ýüreginde beýik Magtymgulynyň adyny dünýä mälim eden bu ýerleriň ähmiýetini görkezýän ilkinji ýadygärlik otyrdyldy.

Agşam “Prezident” myhmanhanasynda Türkmenistanyň Garaşsyzlygynyň 33 ýyllygyna we Magtymguly ýadygärliginiň açylyşyna bagyşlanan kabul edişlik we konsert guraldy. Bu möhüm waka syýasatçylary, medeni we ylmy işgärleri, şeýle hem Moskwada ýaşaýan türkmen diasporasynyň wekillerini bir ýere jemledi. Kabul edişlige Türkmenistanyň Gahrymany, akademik Iwan Kuzmin hem gatnaşdy.

Çärä Türkmenistandan gelen suratkeşleriň we bagşylaryň, şeýle hem Gelikon opera teatrynyň sungat ussady Darýa Guseýnowa we kompozitor Mämmet Guseýnowyň çykyşlary bilen bezelen ajaýyp saz maksatnamasy hödürlendi.

Şeýle hem sahnada zehini we ussatlygy bu adamlary biperwaý galdyrmaýan “Dutaryň owazy” festiwalynyň ýeňijileri bardy. “Dutaryň owazy” festiwaly topary agşamky medeni maksatnamany gurnamaga işjeň gatnaşyp, ajaýyp çykyşlar we ýatdan çykmajak täsirler bilen doldurdy. Bu baýramçylyk diňe bir beýik şahyryň we akyldaryň hormatyna däl-de, eýsem dürli medeniýetli we däp-dessurly adamlaryň ýüreklerini we ruhlaryny birleşdirýän ajaýyp baýramçylyk boldy.

Bu ýyl “Dutaryň owazy” festiwaly Magtymguly Pyragynyň doglan gününiň 300 ýyllygyna bagyşlanan birnäçe ylham beriji bäsleşikleri gurady. Olaryň arasynda “Oýlanma” surat bäsleşigi, beýik şahyryň goşgulary üçin kompozisiýa bäsleşigi, eserlerini okyjylar üçin bäsleşikler bar. Bu wakalar şahyryň zehinine maddy däl ýadygärlik döredýär, mirasyny wasp edýär we sungat baýramçylygy dürli medeniýetleri baglanyşdyrýar we ajaýyp söz ussadynyň işine düşünmek üçin täze gözýetimler açýar.

ORIENT news

Foto: “Dutaryň owazy” festiwalynyň guramaçylyk topary tarapyndan berlen