Magtymguly adyndaky Türkmen döwlet uniwersiteti Italiýanyň Daşary ýurtlylar üçin Peruja uniwersiteti bilen özara düşünişmek barada Ähtnama gol çekdi.

Gol çekmek dabarasy Aşgabatda geçirildi.

Bu resminama daşary ýurt dillerini okatmagyň häzirki zaman usulyýetini girizmek we öňdebaryjy mugallymçylyk tejribesini ösdürmek boýunça taraplaryň hyzmatdaşlygyny; iki ýokary okuw mekdepleriniň arasynda özara gatnaşyklary ösdürmek, şol sanda daşary ýurt dillerini okatmagy kämilleşdirmek maksady bilen okuw meýilnamalaryň, maksatnamalaryň, okatmagyň usulyýetleriniň we ylmy-usuly gollanmalaryň, ylmy neşirleriň we okuw kitaplaryň alyş-çalyşyny göz öňünde tutýar. Ähtnama laýyklykda, Magtymguly adyndaky Türkmen döwlet uniwersitetiniň haýyşy bilen Daşary ýurtlylar üçin Peruja uniwersiteti italýan dilini okatmak boýunça mugallymlary ugradar.

Daşary ýurtlylar üçin Peruja uniwersiteti Italiýanyň iň gadymy we abraýly uniwersitetleriniň biri hasaplanylýar. 1921-nji ýylda esaslandyrylan bu Uniwersitet ýörite daşary ýurtlylar üçin italýan diliniň we medeniýetiniň okadylmagyna bagyşlanan Italiýanyň ýeke-täk uniwersitetidir. Owadan Peruja şäherinde ýerleşen Uniwersitet daşary ýurtly talyplar üçin dil kurslaryndan italýan dili we medeniýeti boýunça dereje almak maksatnamalaryna çenli kurslaryň we maksatnamalarynyň giň görnüşlerini hödürleýär.

ORIENT news