Biz ýakynlaşmagy ugur edinýäris

14-nji noýabr, penşenbe güni telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň “Türkmentel — 2024” atly halkara forumy Aşgabatda, Söwda-senagat edarasynyň binasynda açyldy.

Sergi bilen maslahaty öz içine alýan forum şu ýyl 17-nji gezek geçirilýär we gurnaýjylar tarapyndan toplanan tejribe bu çäräni ählumumy tehnologiki ösüşi we sanly geljegiň nukdaýnazaryndan telekommunikasiýanyň üýtgeýän keşbini ara alyp maslahatlaşmak üçin bu çäräni ýokary hünär derejesindäki esasy pudak hökmünde görkezmäge mümkinçilik berýär.

“Türkmentel — 2024” atly halkara sergisiniň resmi açylyş dabarasyna Türkmenistan hökümetiniň, ilçihanalaryň we halkara guramalaryň wekilleri gatnaşdy.

Prezident Serdar Berdimuhamedowyň foruma gatnaşyjylara iberen Gutlagyny Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew okady.

Soňra myhmanlar sergi bilen tanyşdylar. Söwda-senagat edarasynyň maslahatlar we sergi meýdançasyna 30 ýurtdan 80-den gowrak kompaniýanyň, guramanyň we hökümet edaralarynyň 200-den gowrak wekili ýygnandy. Tehnologiýa forumyna gatnaşýan ýurtlaryň arasynda Hytaý, Russiýa, ABŞ, Türkiýe, Beýik Britaniýa, Fransiýa, Germaniýa, Italiýa, Gresiýa, Ispaniýa, Irlandiýa, Awstriýa, Belgiýa, Şweýsariýa, Finlýandiýa, Estoniýa, Koreýa Respublikasy, Hindistan, Belarus, Ukraina, Ysraýyl, BAE, Singapur, Liwan, Malaýziýa şeýle hem ýakyn goňşular – Özbegistan, Gazagystan, Gyrgyzystan, Azerbaýjan, Owganystan ýaly ýurtlar bar.

Sergide “Apple”, “Huawei”, “Nokia”, “Motorola”, “Thales” ýaly dünýä markalarynyň stendlerini görmek bolýar. Elbetde, Türkmenistan IT pudagynda we häzirki zaman aragatnaşyk pudagynda özüniň mümkinçiliklerini giňden görkezýär. Sergidäki iň uly pawilion “Türkmenaragatnaşyk” agentligi tarapyndan düzüldi. Ýerli sergä gatnaşýanlaryň arasynda – “TM CELL” markasy boýunça hyzmatlary berýän “Altyn Asyr” öýjükli aragatnaşyk operatory, “Türkmenpoçta” poçta operatory, şeýle hem “Aýdyň Gijeler”, “Nurly Tolkun”, “Belet”, “Sanly Çözgüt” we başga birnäçe kompaniýalar bar.

“Türkmentel-2024” almy ylmy maslahaty günüň ikinji ýarymynda başlar. Alymlar, bilermenler, telekeçiler we düzgünleşdirijiler sanly üýtgeşmeler, kiberhowpsuzlyk, aragatnaşygyň geljegi, hemra tehnologiýalary, şeýle hem döwletiň sanly ösüş strategiýasy bilen baglanyşykly meselelerde halkara hyzmatdaşlygynyň ösüşini ara alyp maslahatlaşarlar.

Forumyň dowamynda, şenbe güni, “Sanly çözgüt — 2024” atly innowasiýa bäsleşiginiň netijeleri jemlener, bu ýerde iň oňat ýaş işläp düzüjiler sanly önümlerini işewür toparlaryna görkezmäge mümkinçilik alarlar.

Çäräniň çäginde Türkmenistanyň döwlet we hususy kärhanalary bilen daşary ýurt kompaniýalarynyň arasyndaky duşuşyklar hem meýilleşdirilýär.

ORIENT

Foto: orient.tm