Biz ýakynlaşmagy ugur edinýäris

30-31-nji oktýabr aralygynda, Hazarýaka döwletleriniň Söwda-senagat edaralarynyň “Işjeň Hazar” atly XXI işewürlik hyzmatdaşlygy boýunça Halkara Geňeşiniň mejlisi geçirilýär.

Çarşenbe güni, Astrahan sebitindäki Türkmenistanyň konsuly Gadam Ilamanow “Işjeň Hazar – netijeli hyzmatdaşlygyň tejribesi we geljegi” atly umumy mejlisinde çykyş edip, Hazar sebitiniň esasy ýurtlarynyň biri hökmünde Türkmenistanyň, kenarýaka döwletleriň arasynda hemmetaraplaýyn we özara peýdaly hyzmatdaşlygy yzygiderli goldaýandygy nygtady.

Bu çärä Astrahan sebitiniň gubernatory Igor Babuşkin, Eýran Yslam Respublikasynyň konsuly, söwda we senagat edarasynyň wekilleri, döwlet we sebit ýerine ýetiriji we kanun çykaryjy edaralar, Russiýa Federasiýasyň, Azerbaýjanyň, Eýranyň, Gazagystanyň, bilermenleri, alymlary we syýasatçylary, Hazarýaka ýurtlarynyň jemgyýetçilik guramalarynyň ýolbaşçylary gatnaşdylar.

Tematiki bölümleriň dowamynda gatnaşyjylar Hazar sebitiniň ýurtlarynyň arasyndaky “Demirgazyk-Günorta” halkara ulag geçelgesini ösdürmek babatynda, hususan-da port infrastrukturasyny döwrebaplaşdyrmak meseleleri şeýle hem syýahatçylygy ösdürmek, söwda we ykdysady gatnaşyklary we ş.m. bilen hyzmatdaşlygy hemmetaraplaýyn giňeltmek meselelerini ara alyp maslahatlaşdylar.

Astrahan sebitiniň ýolbaşçysy sebitiň ulag we logistika infrastrukturasyny işjeň ösdürýändigini we haryt alyş-çalşygynyň möhüm üstaşyr merkezine öwrülýändigini belledi. Hususan-da, birnäçe daşary ýurtly iri kompaniýalaryň wekilleriniň eýýäm üstünlikli işleýän ýörite porty we ykdysady zolaklary birleşdirýän Hazar klasteri muňa ýardam berýär.

“Mysal üçin, geçen ýyldan bäri rus-türkmen kompaniýasy un degirmen toplumyny gurmak taslamasyny durmuşa geçirýär. Logistik zynjyryny giňeltmek we hyzmatdaşlygy ösdürmek üçin häkimiýetleriň işini işewür toparlary bilen utgaşdyrmak gaty möhümdir” – diýip, Babuşkin öz sosial ulgamyndaky sahypasynda ýazdy.

ORIENT news

Foto: Türkmenistanyň Astrahandaky konsullygy tarapyndan berlen