Biz ýakynlaşmagy ugur edinýäris

24-nji noýabrda paýtagtyň “Arkaç” söwda-dynç alyş merkezinde “Technovation Girls Turkmenistan” atly maksatnamasynyň nobatdaky möwsüminiň açylyş çäresi geçirildi. Duşuşyk gyzyklanýan gatnaşyjylary, telekeçileri we maksatnamanyň öňki möwsümleriniň uçurumlaryny bir ýere jemledi.

Nobatdaky möwsümiň başlanmagy mynasybetli ýurt boýunça taslama toparynyň wekilleri tanyşdyryş dabarasyny geçirdiler we “Technovation Girls”-iň esasy taraplary barada jikme-jik gürrüň berdiler, geçen ýyllaryň gazananlaryny paýlaşdylar: geçen möwsümlerde ählumumy bäsleşiginiň dünýä ýarym finalyna Türkmenistandan 14 topar çykdy.

Duşuşyk adatça torlaýyn sessiýa bilen tamamlandy, şol wagtda gatnaşyjylar birek-birek bilen, çagyrylan bilermenler we maksatnama hyzmatdaşlary bilen ýakyndan tanyşdylar.

Halkara “Technovation Girls” atly maksatnamasy Türkmenistanda eýýam yzly-yzyna 4 ýyl bäri geçirilýär. Taslama, durmuş ulgamyndaky telekeçiligi ösdürmäge we STEM (ylym, tehnologiýa, inženerçilik we matematika) ugurlarynda ýaş gyzlar üçin mümkinçilikleri ösdürmäge gönükdirilen ählumumy başlangyçdyr.

Gyzlar üçin geçirilen uly göwrümli tehnologiýa bäsleşiginiň çäginde gatnaşyjylar toparlara 5 adama çenli ýygnanýarlar we ýerli ýa-da halkara derejesinde durmuş ugurly meseleleri çözmäge kömek edýän ykjam programma döretmek üçin işleýärler.

Her möwsümiň ahyrynda finala çykan toparlar Kaliforniýada geçirilen Bütindünýä sammitine ýygnanýarlar we öz prototiplerini “Google”, “Meta” we “Amazon” ýaly öňdebaryjy tehnologiýa kompaniýalarynyň ýolbaşçylaryna hödürleýärler. Bu maksatnama Amerikanyň Birleşen Ştatlarynyň Türkmenistandaky ilçihanasynyň goldawy bilen amala aşyrylýar.

Maksatnama barada has giňişleýin maglumaty resmi web sahypasynda we taslamanyň Instagram sahypasynda (@technovation_tm) tapyp bilersiňiz.

ORIENT

Foto: Technovation Girls Turkmenistan