Tehnologiýa ösüşiniň ykdysady-durmuş şertlerine täsiri

25.07.2024 | 12:38 |

Hormatly Prezidentimiziň parasatly baştutanlygynda innowasion ösüş ýoluna düşen ýurdumyzda «Türkmenaragatnaşyk» agentligi tarpyndan sanly ykdysadyýeti ösdürmegiň 2025-nji ýyla çenli döwür üçin Konsepsiýasynda öňde goýlan wezipeleriň ýerine ýetirilmegini üpjün etmek we olaryň gerimine laýyk gelýän infrastrukturany döretmek ugrunda uly işler alnyp barylýar.

«Türkmenaragatnaşyk» agentliginiň Türkmenistanyň Telekommunikasiýalar we informatika institutynyň ýanyndaky «Sanly çözgüt – IT meýdança» hojalyk jemgyýeti ýurtda sanlylaşdyrmagy ösdürmäge gönükdirilen wezipeleriň çäklerinde maglumat, telekommunikasiýa we intellektual ulgamlaryny, sanly tehnologiýalary, elektronikany we innowasiýa ugurlaryny dolandyrjak hünärmenlerini taýýarlaýar.

«Sanly çözgüt IT meýdança» hojalyk jemgyýetinde hereket edýän gurnaklara ýurdumyzyň öňdebaryjy IT kompaniýalary, hususy telekeçileri, talyplary we programma üpjünçiligini döredip bilýän adaty raýatlary dahyllar (rezident) hökmünde hasaba alynýar we düzümindäki dahyllar işleriniň netijelerine laýyklykda şertnama arkaly iş orunlar bilen üpjün edilýär.

Sanly ykdysadyýete geçmek boýunça bu ulgamda döwrebap işler alnyp barylýar we hyzmatlaryň birnäçe görnüşleri ýerine ýetirilýär. Olar:

Elektron resminama dolanşygy;

Programma üpjünçiligini işläp taýýarlamak;

Hasaplaýyş ulgamlaryny dolandyrmak işleri;

Web saýtlary we web saýtlaryň baş sahypalaryny döretmek;

Informasion usuly we hasaplaýyş tehnikasynyň ugry boýunça beýleki işler;

Habarlary işläp taýýarlamak we ýerleşdirmek, amaly programmalar we olar bilen baglanşykly işler, web-portaly ulanmak;

Ýer kadastrasyny döretmek we dolandyrmak;

Elektron mekdep ulgamyny döretmek we dolandyrmak; Web-saýtlary tehniki goldawa almak.

Häzirki wagtda, jemgyýetiň düzüminiň gerimini giňeltmek maksady bilen 5 ýaşdan 14 ýaşa çenli ýetginjekler üçin, 6 hepde dowam edýän täze «Okuw başlangyçlary üçin robot tehnikasy» ugry boýunça gurnagy döredildi. Gurnakda robot kömekçileriniň täze görnüşlerini işläp taýýarlamak işleri amala aşyrylýar. Robotlaryň emeli aň bilen täze innowasiýa tehnologiýalar döwrüni has-da kämilleşdirjek ugurlary işlenip düzülýär.

Şeýle hem, «Kompýuter sowatlylygy», «Tor tehnologiýalary», «Programmirleme dilleri» boýunça gysga möhletli okuw gurnaklaryna ylmyň we tehnologiýanyň soňky gazananlary bilen gyzyklanýan ýetginjekler, zehin başarnyklaryna laýyklykda, bäsleşik esasynda kabul edilýär.

Robot tehnologiýasy wagty tygşytlamak bilen gije-gündiziň dowamynda edara-kärhanalarynyň önümçilik işlerini we ýaşaýyş şertlerinde gündelik durmuşymyzyň wezipelerini ýerine ýetirer.

Şunuň bilen baglylykda, aragatnaşyk ulgamynyň innowasiýa tehnologiýalary öwrenilip döwlet we hususy hyzmatlarynyň hilini ýokarlandyrmak we görnüşlerini artdyrmak boýunça «Sanly çözgüt IT meýdança» hojalyk jemgyýetinde programma üpjünçiliginiň we robot tehnologiýasynyň dürli görnüşleri taýýarlanyp, durmuşymyza ornaşdyrylýar. Bu bolsa sanlylaşdyrmagyň esasy görkezijisi bolup, pudaklaryň işini sanly giňişlige geçirmekde möhüm ugur bolup çykyş edýär.

«Türkmenaragatnaşyk» agentligi tarapyndan aragatnaşyk torlarynyň çäksiz mümkinçiliklerinden milli ýörelgelerimiz esasynda peýdalanyp, döwrebap tehnologiýalar bilen utgaşýan täze pikirler esasynda programma üpjünçiliklerini işläp taýýarlaýan, ylmy açyşlary, oýlap tapmalary işläp düzýän zehinli ýaşlarymyzy ýüze çykarmak maksady bilen, her ýyl «Sanly çözgüt» atly innowasion taslamalarynyň bäsleşigi geçirilýär.

Bu bäsleşigiň dowamynda hem sanly ulgamy özgertmek boýunça täze pikirleri, ýaşaýyş-durmuş şertlerini has-da amatlaşdyrjak oýlap tapmalary işläp düzýän zehinli IT hünärmenler ýüze çykýar. Ýaş zehinleriň işläp taýýarlaýan taslamalary ýurdumyzyň ähli dolandyryş edara-kärhanalaryna we jemgyýetçilik durmuş şertlerine giňden ornaşdyrylýar.

ORIENT news