Biz ýakynlaşmagy ugur edinýäris

16-njy dekabrda Prezident Serdar Berdimuhamedow “Itochu Corporation” kompaniýasynyň direktorlar geňeşiniň agzasy, ýerine ýetiriji wise-prezidenti, maşyn we enjamlar kompaniýasynyň prezidenti, Ykdysady hyzmatdaşlyk boýunça ýapon-türkmen komitetiniň başlygy Hiroýuki Subaýy kabul etdi.

Myhman Ýaponiýanyň işewür toparlarynyň amatly maýa goýum ýagdaýy, işlemek üçin ähli zerur şertler döredilen türkmen bazarynda iş alyp barmaga uly gyzyklanma bildirýändiklerini nygtady. Pursatdan peýdalanyp, ýapon-türkmen gatnaşyklarynyň ösdürilmegine uly şahsy goşant goşýan türkmen halkynyň Milli Lideri, Türkmenistanyň Halk Maslahatynyň Başlygyna iň gowy arzuwlaryny beýan etdi. Bu barada Türkmenistanyň Döwlet teleradio ýaýlymynyň habarlar gepleşiginde habar berildi.

Prezident Serdar Berdimuhamedow Ykdysady hyzmatdaşlyk boýunça türkmen-ýapon komitetiniň nobatdaky 15-nji mejlisiniň iki ýurduň arasyndaky ykdysady gatnaşyklary ösdürmäge itergi berjekdigine ynam bildirdi.

Duşuşygyň dowamynda bellenilişi ýaly, Türkmenistan Aziýa — Ýuwaş umman sebitinde ýerleşýän Ýaponiýa bilen hyzmatdaşlygyň hemmetaraplaýyn ösdürilmegine aýratyn ähmiýet berýär.

Biziň ýurtlarymyz ikitaraplaýyn we köptaraplaýyn görnüşde – “Merkezi Aziýa + Ýaponiýa” dialogynyň çäklerinde üstünlikli hyzmatdaşlyk edýärler. Häzirki wagtda ikitaraplaýyn gatnaşyklar syýasy-diplomatik, söwda-ykdysady, durmuş, medeni-ynsanperwer we beýleki ugurlary öz içine alýar.

Ýurdumyz köp ýyllaryň dowamynda iri ýapon kompaniýalary bilen gaz pudagynda, himiýa senagatynda iş alyp barmakda oňyn tejribe toplady. Şunda Ykdysady hyzmatdaşlyk boýunça türkmen-ýapon komitetine uly orun degişlidir.

Ýaponiýada indiki ýyl “EKSPO — 2025” Bütindünýä sergisi geçiriler diýip, döwlet Baştutany belledi. Serginiň işine gatnaşmak üçin ýurdumyzda ýörite guramaçylyk toparynyň döredilendigini we häzirki wagtda degişli taýýarlyk işleriniň alnyp barylýandygyny belläp, Türkmenistanyň Prezidenti serginiň üstünlikli geçirilmegini arzuw etdi.

ORIENT

Foto: orient.tm