Aşgabat bilen London diplomatik edaralary derejesinde gepleşikleri geçirdi

01.11.2024 | 23:07 |

31-nji oktýabrda Türkmenistanyň Daşary işler ministriniň orunbasary Ahmet Gurbanow bilen Beýik Britaniýanyň Daşary işler ministriniň orunbasary, Parlamentiň deputaty Stiwen Doutiniň arasynda wideoaragatnaşyk ulgamy arkaly duşuşyk geçirildi.

“Syýasy-diplomatik, söwda-ykdysady we medeni-ynsanperwer ugurlar boýunça ikitaraplaýyn hyzmatdaşlygyň, şeýle hem sebit we halkara gün tertibiniň meseleleriniň giň toplumy ara alnyp maslahatlaşyldy” – diýip, duşuşygyň mazmuny barada Türkmenistanyň Daşary işler ministrliginde habar berildi.

Durmuş pudagy döwletara gatnaşyklaryň möhüm ugry hökmünde kesgitlenildi. Şu nukdaýnazardan diplomatlar medeniýet we bilim, hususan-da Türkmenistanda iňlis dilini öwrenmek babatynda oňyn hyzmatdaşlygy bellediler.

2024-nji ýylyň aprelinde Beýik Britaniýanyň Daşary işler ministri Dewid Kameron ilkinji gezek Aşgabat şäherine taryhy saparyny amala aşyrdy. Bu Daşary syýasat edarasy tarapyndan Türkmenistan bilen gatnaşyklar ugrunda ilkinji gezek amala aşyryldy.

ORIENT news