Biz ýakynlaşmagy ugur edinýäris

Türkmenistandaky Türkiýe Respublikasynyň Adatdan daşary we doly ygtyýarly ilçisi özüniň Aşgabatdaky rezidensiýasynda (hemişelik oturýan ýerinde) Türkiýe Respublikasynyň 101 ýyllygy mynasybetli kabul edilşigi geçirdi. Türkmenistanyň Ministrler Kabinetiniň Başlygynyň orunbasary Batyr Atdaýew hem-de daşary ýurtly diolomatik wekilhanalarynyň, guramalarynyň hem-de Türkmenistanda öz işini alyp barýan köpçülikleýin habar beriş serişdeleriniň wekilleri myhman hökmünde gatnaşdylar.

Çärede eden çykyşynyň dowamynda Türkmenistanyň Ministrler Kabinetiniň Başlygynyň orunbasary Batyr Atdaýew türk halkyny Respublikanyň Güni bilen gutlady. Şeýle-de Batyr Atdaýew soňky 30 ýylyň dowamynda ýurtlaryň arasynda köpsanly ylalaşyklaryň we dürli pudaklarda taslamalaryň durmuşa geçirilendigi barada belläp geçdi.

Ilçi Ahmet Demirok Türkiýe Respublikasynyň 101 ýyllygynyň Türkmenistanda bellenilmegi uly mertebedigini belläp, myhmanlary bu çärede mähirli garşylady.

— Bu gün biz Türkmenistan Watanymyzda uly buýsanç, şatlyk we tolgunma bilen Türkiýe Respublikasynyň yglan edilmeginiň 101 ýyllygyny belleýäris. Bu gün biz bilen şatlykly duýgylary paýlaşýanyňyz üçin siziň her biriňize minnetdarlygymy bildirýärin. Bu ýyl Türkmenistan bilen Türkiýeniň arasynda diplomatik gatnaşyklaryň ýola goýulanyndan bäri 32 ýyly dolýar. Biziň doganlyk halklarymyzyň arasynda gatnaşyklaryň pugtalandyrylmagyna öz goldawlaryny berýändikleri üçin men Türkmenistanyň hormatly Prezidenti Serdar Berdimuhamedowa hem-de türkmen halkynyň Milli Liderine öz çäksiz minnetdarlygymy bildirýärin. Çykyşyny dowam edip, Ilçi çärä gatnaşyjylara mähirli gutlaglary üçin öz hoşallygyny bildirdi.

Türkiýe bilen Türkmenistanyň arasyndaky gatnaşyklarynda ýetilen ýokary derejesiniň dürli ugurlarda, şol sanda söwda-ykdysady hyzmatdaşlykda hem öz beýanyny tapandygyny bellemek zerur. 2023-nji ýylda söwdanyň umumy möçberi 2,6 mlrd dollara barabar boldy. 2024-nji ýylyň ýanwar-awgust aýlarynda ikitaraplaýyn söwda 1,532 mlrd dollara deň bolup, geçen ýylyň şu wagty bilen deňeşdirilende 16 % artdyryldy. Bu görkezijiniň 5 mlrd dollar söwda aýlanyşygyna ýetjekdgine garaşylýar.

Türkmenistan Garaşsyzlygyna eýe bolanyndan soňra, türk kompaniýalary Tzürkmenistanda müňden gowrak taslamalary durmuşa geçirdiler. Bu bolsa Türkmenistanyň türk kompaniýalaryna bildirýän ynamyň subutnamasydyr. Türk kompaniýalary Türkmenistanda tehnologiýalary talap edýän elektrik beketler, elektrik geçiriji ugurlar, awto menziller, ýaşaýyş jaýlary, söwda merkezleri, uniwersitetler, mekdepler, jemgyýetçilik binalar, myhmanhanalar, fabrikler, muzeýler, seýilgähler, hassahanalar we port gurluşygy ýaly möhüm infrastruktura taslamalaryny durmuşa geçirdiler. Häzirki wagtda türk kompaniýalary tarapyndan 4,4 mlrd dollarlyk 19 sany taslama alnyp barylýar.

Ozal Türkmenistanyň Prezidenti Serdar Berdimuhamedowyň prezident Rejep Taýyp Ärdogana Respublikanyň Güni mynasybetli gutlaglaryny we iň gowy arzuwlaryny ýollandygyny ýatladýarys.

Foto: Orient.tm