Brýusselde Merkezi Aziýa ýurtlarynyň ilçileriniň CISM-iň Baş sekretary bilen duşuşygy geçirildi

19.10.2024 | 18:40 |

Halkara Harby Sport Geňeşiniň (CISM) Brýusselde ýerleşýän ştab-kwartirasynda Merkezi Aziýa ýurtlarynyň ilçileri bilen guramanyň Baş sekretary harby deňiz güýçleriniň kapitany Roberto Rekkýanyň arasynda duşuşyk geçirildi. Duşuşykda CISM-iň işleri, başlangyçlary we guramanyň howandarlygynda geçirilen halkara sport çärelerine Merkezi Aziýa ýurtlarynyň gatnaşmagy bilen baglanyşykly meseleler ara alnyp maslahatlaşyldy.

CISM-iň Baş sekretary guramanyň işi barada giňişleýin aýdyp berdi we Merkezi Aziýa ýurtlarynyň dünýäde geçirilýän sport ýaryşlaryna has işjeň gatnaşmagynyň ähmiýetini nygtady. Şeýle hem, CISM-iň harby sporty ösdürmek we sport başlangyçlary arkaly halkara gatnaşyklaryny berkitmek üçin öz işlerine mümkin boldugyça köp ýurt çekmäge synanyşýandygyny belläp geçdi.

19102024-v-bryussele-vstrecha-poslov-stran-ca-s-gensekom-cism (3).JPG

Türkmenistanyň Belgiýadaky diplomatik wekilhanasynyň habar berşi ýaly Türkmenistanyň Ilçisi Sapar Pälwanow duşuşykda sport ýurduň içerki we daşary syýasatynda ileri tutulýan ugurlaryň biridigini belledi. Hususan-da, Ilçi: “Türkmenistan üçin sport diňe bir milli maksatnamanyň möhüm bölegi bolman, eýsem halkara gatnaşyklarynyň hem esasy ugrydyr. Ähli derejedäki sport başlangyçlaryny işjeň goldaýarys we 2017-nji ýylda Aziýa oýunlaryny geçirmekdäki üstünlikli tejribämizi göz öňünde tutup, Türkmenistany iri halkara ýaryşlarynyň geçiriljek ýeri hökmünde hödürlemäge taýýardyrys” – diýip aýtdy.

Häzirki wagtda türkmen türgenleri, esasanam harby pälwanlar, Özbegistanyň Daşkent şäherinde dowam edýän sport çärelerine gatnaşyp, taýýarlygynyň ýokary derejesini görkezýärler. Türkmenistan, halkara sport başlangyçlaryna gatnaşygyny berkidip, CISM bilen hyzmatdaşlygy has işjeň ösdürmegi maksat edinýär.

19102024-v-bryussele-vstrecha-poslov-stran-ca-s-gensekom-cism (4).JPG

Türkmen tarapy Halkara Harby Sport Geňeşi bilen hyzmatdaşlygy has-da giňeltmäge taýýardygyny aýtdy – diýip, diplomatik wekilhanasy habarynyň üstüni ýetirdi.

Halkara Harby Sport Geňeşi (CISM), 1948-nji ýylda döredilen halkara guramasy bolup, sport arkaly parahatçylygy we dostlugy ösdürmek üçin dürli ýurtlardan harby gurluşlary birleşdirýär. CISM 140-dan gowrak ýurtdan harby işgärleriň gatnaşmagynda sport çärelerini geçirýär. Türkmenistan 2018-nji ýylda CISM-yň agzasy boldy we şondan bäri harby sportuň ösüşine işjeň goldaw berýär, bu guramanyň howandarlygynda geçirilýän halkara ýaryşlaryna gatnaşygyny artdyrmaga çalyşýar.

ORIENT news