Türkmenistanyň Russiýa Federasiýasyndaky ilçisi Rushyzmatdaşlygyň ýolbaşçysy Ýewgeniý Primakow bilen duşuşdy

19.10.2024 | 05:05 |

18-nji oktýabrda, anna güni Türkmenistanyň Russiýa Federasiýasyndaky ilçisi Esen Aýdogdyýew Russiýa Federasiýasynyň Garaşsyz Döwletleriň Arkalaşygynyň, daşary ýurtlarda ýaşaýan watandaşlaryň işleri we halkara ynsanperwer hyzmatdaşlygy boýunça Federal agentligiň (“Rossotrudniçestwo”) ýolbaşçysy Ýewgeniý Primakow bilen duşuşdy.

Duşuşykda söhbetdeşler bar bolan uly mümkinçiliklerden peýdalanyp, özara gyzyklanma döredýän ynsanperwer hyzmatdaşlygy babatynda ikitaraplaýyn gatnaşyklary güýçlendirmek meselelerini jikme-jik ara alyp maslahatlaşdylar. Primakow iki döwletiň arasyndaky ynsanperwer ugurdaky gatnaşyklaryň ösüşine ýokary baha berdi diýi, Türkmenistanyň diplomatik wekilhanasynyň habarynda aýdylýar.

Söhbetdeşligiň dowamynda Ilçi Aýdogdyýew Moskwada Magtymguly Pyragynyň heýkeliniň açylmagy, 11-nji oktýabrda Aşgabatda geçirilen birnäçe döwlet ýolbaşçylarynyň gatnaşmagynda geçirilen üstünlikli “Döwürleriň we siwilizasiýalaryň özara arabaglanyşygy – parahatçylygyň we ösüşiň binýady” atly halkara derejeli forum barada şeýle hem 16-17-nji oktýabr aralygynda Türkmenistanda geçirilen Russiýa Federasiýasynyň Medeniýet günleri barada belläp geçdi.

Söhbetdeşler iki ýurduň ylym, bilim we medeni institutlary üçin gyzyklanma döredýän hyzmatdaşlygyň mundan beýläk-de ösdürilmegini dowam etdirmegiň zerurlygy barada ylalaşdylar we bu ugurda özara gatnaşyklary mundan beýläkde dowam etdirmek isleýändiklerini mälim etdiler.

Duşuşyk dostluk we özara düşünişmek äheninde geçirildi diýi, diplomatik gullugyň habarynda beýän edilýär.

Şeýle hem, Russiýa Federasiýasyndaky Türkmenistanyň ilçihanasy Magtymgulynyň saýlanan eserler ýygyndysynyň türkmen, rus we iňlis dillerindäki ýubileý nusgalaryny Russiýa Ylymlar akademiýasynyň kitaphana gazanasyna, M.W. Lomonosow adyndaky Moskwanyň Döwlet uniwersitetine, P.Lumumba adyndaky Russiýanyň halklaryň dostlugy uniwersitetine we Moskwa Döwlet Halkara gatnaşyklary institutyna we uly kitaphanalaryna – Russiýanyň Döwlet kitaphanasyna, Russiýa Ylymlar akademiýasynyň gündogary öwreniş institutyna, M.I.Rudomino adyndaky Bütinrussiýa döwlet daşary ýurt edebiýaty kitaphanasyna, Russiýanyň Döwlet köpçülikleýin taryhy kitaphanasyna, Sankt-Peterburgyň Döwlet uniwersitetiniň M.Gorki adyndaky Ylmy kitaphanasyna, Russiýanyň Ylymlar akademiýasynyň kitaphanasyna, Russiýanyň Milli kitaphanasyna we ş.m. gowşurlandygyny habar berdi.

ORIENT news