Aşgabatda "Nalmes" toparynyñ çykyşyndan täsirli pursatlar

16.10.2024 | 23:55 |

16-njy oktýabrda sagat 19:00-da Russiýa Federasiýasynyñ Medeniýet günleriniñ başlan güni Türkmenistanyñ Döwlet medeniýet merkeziniñ Mukamlar köşgi ýatdan çykmajak duýgylaryñ ýerine öwrüldi.

Gelen myhmanlar çykyşyñ öñ ýanynda W.D.Polenow adyndaky Russiýanyñ Döwlet halk döredijilik öýi tarapyndan gurnalan "Russiýanyñ gurnama mozaikasy" atly göçme sergisini uly gyzyklanma bilen synlap bildiler.

Sergi ekspozisiýasynda rus keşdeçilik ussatlarynyñ işleri ýerleşdirildi, bu bolsa medeni agşamyñ ýerlikli sözbaşy boldy.

Türkmenistanyñ medeniýet ministriniñ orunbasary Nursähet Şirimowyñ hem-de Türkmenistanda Russiýa Federasiýasynyñ Adatdan daşary we doly ygtyýarly Ilçisi Iwan Wolynkiniñ gutlag sözlerinden soñ tomaşaçylardan doly zal konsertiñ başlanmagyna sabyrsyzlyk bilen garaşýardy.

Agşam Adygeýa Respublikasynyñ halk tansynyñ Döwlet akademiki topary "Nalmesiñ" ajaýyp çykyşy bilen başlap, ol özüniñ ussatlygy we ýerine ýetirijiligiñ täsirliligi bilen tomaşaçylaryñ ýüregini eýeledi.

Russiýa Federasiýasynyñ at gazanan artisti Aslan Hajiýewiñ ýolbaşçylygynda "Nalmes" topary baý mazmunly çykyşlary hödürläp, onda tomaşaçylar bir sahnada onlarça jübüt tansçylarynyñ ýerine ÿetirilmeginde adyglaryñ taryhy tanslaryny tomaşa edip bildiler. "Yslameý" gadymy tansy, "Anatoliýa çerkesleriñ tansy", "Nalmes tans edýär" tans kompozisiýasy hem-de täsirli hanjarly tansy tomaşaçylarda aýratyn täsir galdyrdy.

Artistler sanly minutlarda konsert egin-eşiklerini çalyşmaga başarýardylar, bu bolsa çykyşlaryna hereket goşýardy. Halk owazlardan ybarat "popurrini" we "Dep doulide Kawkaz äheñlerini" ýerine ýetiren orkestr toparynyñ çykyşy konsertiñ aýrylmaz bölegi boldy.

Kawkaz halklarynyñ zenan-gyzlarynyñ ýerine ýetirilmegindäki tanslar elleriñ täsirli çeýeligi bilen häsiýetlenip, onda her bir el hereketi çuñ mana eýe bolup, duýgylary beýan edýär. Tansçylar ona golaý dürli tanslaryny ýerine ýetirip, olaryñ her birisi tomaşaçylary haýran galdyryp, güýçli el çarpyşmalara eýe boldy. 1936-njy ýylda esaslandyrylan "Nalmes" topary Adygeýanyñ hakyky hazynasydygyny açyp görkezdi.

Aşgabatda Russiýa Federasiýasynyñ Medeniýet günleri 17-nji oktýabra çenli dowam eder. Çäre maksatnamasyny "Pýotr Ilýiç Çaýkowskiniñ ýubileýine tarap" atly nusgawy sazyñ konserti dowam eder. Meşhur pianinoçy Dmitriý Maslow P.I.Çaýkowsiniñ we S.W.Rahmaninowyñ eserlerini ýerine ýetirer. Konsert sagat 19:00-da Mukamlar köşgünde başlar.

ORIENT news