"AMC Overseas" kompaniýasy Türkmenistandan Ýakyn Gündogara we Afrika ýurtlaryna eksport işinde ýardam berip biler

03.09.2024 | 18:25 |

BAE-de Türkmenistanyň Adatdan daşary we doly ygtyýarly ilçisi Serdarmämmet Garajaýew AMC Overseas halkara kompaniýasynyň direktory Suwra Çakraborti bilen duşuşdy. Baş edarasy Dubaý şäherinde ýerleşen AMC Overseas kompaniýasynyň öňümizdäki hepde Aşgabatda geçiriljek Maýa goýum maslahatyna gatnaşmagy duşuşygyň esasy meselesi boldy.

Ilçi Garajaýew gepleşigiň dowamynda bu Maslahatyň hyzmatdaşlygyň we durnukly ykdysady ösüşiň pugtalandyrylmagyna gönükdirilendigi barada belläp geçdi. Bu bolsa azyk we oba hojalyk pudaklarynyň söwda we maýa goýum işlerinde AMC Overseas kompaniýasynyň baý tejribesini göz öňünde tutup, Jenap Çakrabortiniň Maslahata gatnaşmagynyň ähmiýetini ýokarlandyrýar.

Şeýle-de Türkmenistanda AMC Overseas kompaniýasynyň işiniň giňeldilmegi barada maslahatlaşyldy. Suwra Çakraborti bu mümkinçilige gyzyklanma bildirip, taraplar Türkmenistandan Ýakyn Gündogara we Afrika ýurtlaryna haryt we azyk önümleriniň eksport edilişine ýardam bermekde AMC Overseas kompaniýasynyň mümkinçiliklerini ara alyp maslahatlaşdylar.

AMC Overseas kompaniýasy 1996-njy ýyldan bäri GDA ýurtlarynda söwda we maýa goýum işleri bilen, bütin dünýä boýunça senagat pudagyny çig mal we oba hojalyk önümleri bilen üpjün etmek, GDA ýurtlarynyň öndürýän önümlerini dünýä bazaryna çykarmak işleri bilen meşgullanýar.

ORIENT news