Gurbanguly Berdimuhamedow Budapeştde TDG-yň Aksakgallar geňeşiniň mejlisine gatnaşdy

30.11.2024 | 03:00 |

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Budapeştde Wengriýanyň Daşary işler we söwda ministrliginiň binasynda geçirilen Türki döwletleriň guramasynyň Aksakgallar geňeşiň 16-njy mejlisine gatnaşdy.

Mejlisiň gün tertibine Türki döwletleriň guramasynyň Aksakgallar geňeşiniň işi bilen baglanyşykly möhüm meseleler girizildi. Şeýle hem Gurama agza ýurtlaryň bilelikdäki işiniň ileri tutulýan ugurlary, Aşgabatda geçirilen 15-nji mejlisde kabul edilen teklipleriň durmuşa geçirilişi ara alnyp maslahatlaşyldy.

Bu gurluşyň 15-nji mejlisi şu ýylyň mart aýynda Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde Aşgabatda geçirildi.

Aksakgallar geňeşi Türki döwletleriň guramasynyň maslahat beriji guramasy bolup, onuň düzümine belli jemgyýetçilik işgärleriniň hataryndan bellenilýän Türki döwletleriň guramasyna agza ýurtlaryň Aksakgallary girýär. Türkmen halkynyň Milli Lideri Gurbanguly Berdimuhamedow 2022-nji ýylyň aprelinden bäri bu geňeşiň agzasydyr.

ORIENT