Biz ýakynlaşmagy ugur edinýäris

11-nji fewralynda Aşgabatda Türkmenistanyň we Awstriýa Respublikasynyň diplomatik edaralarynyň arasynda syýasy geňeşmeler geçirildi.

Türkmen tarapyna Türkmenistanyň Daşary işler ministriniň orunbasary Ahmet Gurbanow, awstriýa tarapyna Awstriýa Respublikasynyň Ýewropa we halkara işler boýunça federal ministrliginiň Syýasy meseleler boýunça Baş direktorynyň orunbasary, RF, Gündogar Ýewropa we Günorta Kawkaz, Gündogar hyzmatdaşlygy, Türkiýe we Merkezi Aziýa, Arktika boýunça departamentiniň direktory Gerhard Saýller ýolbaşçylyk etdi.

Taraplar iki ýurduň arasynda halkara düzümleriniň, hususan-da BMG-niň, ÝHHG-nyň we ÝB-niň çäklerindäki hyzmatdaşlygyň ýokary derejesi bellediler. Şunuň bilen baglylykda, ýurtlaryň halkara guramalaryndaky başlangyçlary özara goldamak tejribesini dowam etdirmäge taýýardyklary tassyklanyldy.

Geňeşmeleriň dowamynda ikitaraplaýyn gatnaşyklaryň ileri tutulýan ugurlary, şol sanda syýasy-diplomatik dialogyň, söwda-ykdysady we medeni-ynsanperwer ugurlardaky hyzmatdaşlygyň meseleleri ara alnyp maslahatlaşyldy.

Diplomatlar geçen ýylyň martynda Wena şäherinde gol çekilen Türkmenistanyň we Awstriýanyň syýasat edaralarynyň arasynda 2024-2025-nji ýyllar üçin Hyzmatdaşlyk etmek boýunça maksatnamanyň iş ýüzünde durmuşa geçirilmegi bilen bagly meselelere garadylar.

Söwda-ykdysady ugurdaky özara gatnaşyklary ösdürmek üçin uly mümkinçilikleriň bardygyny aýtmak bilen, taraplar hyzmatdaşlygy mundan beýläk-de giňeltmäge taýýardyklaryny tassykladylar we onuň geljegi uly hasaplanylýan ugurlaryny kesgitlediler diýip, Türkmenistanyň DIM-niň metbugat beýanatynda habar berilýär.

ORIENT

Foto: mfa.gov.tm