Biz ýakynlaşmagy ugur edinýäris

9-njy oktýabr, penşenbe güni Duşanbede Türkmenistanyň Daşary işler ministri Raşid Meredow Garaşsyz Döwletleriň Arkalaşygynyň Daşary işler ministrleriniň Geňeşiniň nobatdaky mejlisine gatnaşdy.

Çäräniň dowamynda GDA-nyň ýurtlarynyň daşary syýasat edaralarynyň ýolbaşçylary häzirki sebit we halkara meseleleri, şeýle hem GDA agza döwletleriň arasyndaky hyzmatdaşlygyň häzirki ýagdaýy we geljegi barada pikir alyşdylar. Halkara söwda-ykdysady hyzmatdaşlygy ösdürmäge, sanly we ulag-üstaşyr gatnaşyklaryny ösdürmäge we beýleki geljegi uly ugurlara aýratyn üns berildi.

GDA-nyň Ýerine ýetiriji komitetiniň metbugat gullugynyň habaryna görä, mejlisiň gün tertibine 15 bent girizildi.

Daşary syýasat edaralarynyň ýolbaşçylary Arkalaşyga gatnaşyjy ýurtlarynyň arasynda 2026–2028-nji ýyllarda medeni hyzmatdaşlygyň esasy çärelerini tassykladylar. Üç ýyllyk täze meýilnama 10 bölümden ybarat bolup, medeni hyzmatdaşlygyň dürli ugurlarynda 138 sany halkara we milli çäräni öz içine alýar.

Taryhy-medeni miras ýerlerini gorap saklamaga we ulanmaga, muzeý we kitaphananyň hyzmatlaryny ösdürmäge, teatr sungatyna we aýdym-sazyna goldaw, kinematografiýany ösdürmäge we medeni pudak üçin ökde hünärmenleri taýýarlamaga aýratyn üns berildi. Taslama bilelikdäki festiwallary, ýaryşlary we maslahatlary, şeýle hem hünärmenleriň arasynda tejribe alyşmagy göz öňünde tutýar. Ylalaşylan resminama tassyklamak üçin GDA-nyň Hökümet Baştutanlarynyň Geňeşine iberiler.

Daşary işler ministrleriň Geňeşi, 2026-njy ýyl üçin Garaşsyz Döwletleriň Arkalaşygynyň çäginde köp derejeli DIM-iň arasynda maslahat beriş meýilnamasyny tassyklady.

Bu resminama, adatça GDA-nyň döwletleriniň BMG-daky garaýyşlaryny utgaşdyrmak we beýleki halkara guramalary bilen özara gatnaşyklar boýunça temalary öz içine alýar. Daşary syýasaty meýilleşdirmek, täze çagyryşlara we howplara garşy göreşmek, ýaraglara gözegçilik we ýaragsyzlanmak meselelerine, maglumat pudagynda özara gatnaşyklara, şeýle hem medeniýet, ylym, bilim, sport, syýahatçylyk, ýaşlar syýasaty we köptaraplaýyn ykdysady diplomatiýanyň häzirki meseleleri boýunça geňeşmeleriň geçirilmegi göz öňünde tutulýar.

DIM-niň Geneşi 2027-nji we 2028-nji ýyllarda GDA ýaşlar paýtagtyny yglan etmek baradaky kararyň taslamasyny tassykladylar. Bu resminamanyň GDA-nyň Hökümet Baştutanlarynyň Geňeşiniň 2026-njy ýylda Aşgabatda geçiriljek mejlisinde tassyklanmagyna garaşylýar.

GDA-nyň Daşary işler ministrleriniň indiki mejlisini 2026-njy ýylyň 17-nji aprelinde Russiýanyň Kaliningrad şäherinde geçirmek barada çözgüt kabul edildi.

ORIENT

Foto: eccis.org