Biz ýakynlaşmagy ugur edinýäris

8-nji oktýabrda Türkmenistanyň Astanadaky we Kuala-Lumpurdaky diplomatik wekilhanalary ýaşlaryň arasynda akademiki hyzmatdaşlygy giňeltmek hem-de hemişelik bitaraplyk syýasatynyň esasy ýörelgelerini wagyz etmek maksadynda gönükdirilen çäreleri geçirdiler.

Gazagystan: L.N.Gumilýow adyndaky Ýewraziýa Milli Uniwersitetinde umumy sapak

Türkmenistanyň Gazagystan Respublikasyndaky Adatdan daşary we Doly ygtyýarly ilçisi Batyr Rejepow L.N.Gumilýow adyndaky Ýewraziýa Milli Uniwersitetiniň professor-mugallymlar düzüminiň we türkmen talyplarynyň öňünde umumy sapak bilen çykyş etdi.

Ilçi çykyşynda ýurdumyzyň daşary syýasatynyň we ýaşlar syýasatynyň esasy ugurlaryna garady, jemgyýetçilik, ykdysady we ylym-bilim ulgamlaryndaky möhüm özgertmeler, döwlet ösüşine bagyşlanan Halk Maslahatynyň mejlisiniň netijeleri hem-de Türkmenistanyň Prezidenti Serdar Berdimuhamedowyň BMG-nyň Baş Assambleýasynyň 80-nji sessiýasynda beýan eden ileri tutýan ugurlary barada giňişleýin gürrüň berdi.

Ilçi 2025-nji ýylda Türkmenistanyň hemişelik bitaraplygynyň 30 ýyllyk baýramçylygynyň taýýarlyk işleriniň möhüm ähmiýetini belläp geçdi. Umumy sapakdan soňra Ilçi aýratyn tapawutlanan talyplara minnetdarlyk hatlaryny gowşurdy, şeýle hem uniwersitetiň kitaphanasyna türkmen halkynyň Milli Lideri Gurbanguly Berdimuhamedowyň kitabyny sowgat hökmünde berdi.

L.N.Gumilýow adyndaky Ýewraziýa Milli Uniwersitetiniň rektory Ýerlan Sydykow bilen geçirilen duşuşykda akademiki alyş-çalyş meseleleri hem-de bilelikdäki ylmy-barlag taslamalaryny amala aşyrmak mümkinçilikleri ara alnyp maslahatlaşyldy. Rektor Türkmenistanyň bitaraplygynyň 30 ýyllygy mynasybetli türkmen tarapyny gutlap, bu syýasatyň sebitde parahatçylygy we durnuklylygy pugtalandyrmagdaky möhüm ornuny belledi.

Malaýziýa: Sanweý Uniwersiteti bilen hyzmatdaşlygyň giňeldilmegi

Şol günüň özünde Türkmenistanyň Malaýziýadaky Ilçihanasynda Sanweý Uniwersitetiniň akademiki jemgyýetiniň wekilleri bilen duşuşyk geçirildi.

Söwda mekdebiniň dekany, hormatly professor Lim Weng Mark duşuşygyň guramaçylygy üçin minnetdarlyk bildirdi hem-de uniwersitetde okaýan türkmen talyplarynyň (250-den gowrak) sanynyň barha artýandygyny, muny mundan beýläk-de ýokarlandyrmagy maksat edinýändiklerini nygtady. Ilçi türkmen talyplaryna berilýän goldaw üçin hoşallyk bildirdi.

Duşuşyk Türkmenistanyň Halkara parahatçylyk we ynanyşmak ýylynyň çäklerinde alyp barylýan işleriň Konsepsiýasyny ara alyp maslahatlaşmak üçin oňyn meýdança boldy. Şunuň bilen baglylykda, dekabr aýynda Aşgabat şäherinde uly halkara forumynyň geçirilmegi meýilleşdirilýär.

ORIENT

Foto: mfa.gov.tm