Biz ýakynlaşmagy ugur edinýäris

10-njy martda ABŞ-nyň Tehas ştatynyň Hýuston şäherinde her ýyl geçirilýän CERAWeek konferensiýasy başlanýar. Bu forum S&P Global guramasy tarapyndan gurnalýar we energetika pudagynyň ýolbaşçylary bilen bilermenleriniň iň täsirli duşuşygy hasaplanýar. CERAWeek-iň maksady – global energetika geljegini üpjün etmek üçin senagat, hökümet we jemgyýetçilik arasynda pikir alyşmak, bilim almak we gatnaşyk gurmak medeniýetini ösdürmekden ybarat.

CERAWeek jemgyýeti energetika, syýasat, maliýe we tehnologiýa ugurlaryndan esasy ýolbaşçylary – kompaniýalaryň baş direktorlaryny, ministrleri we karar kabul edýän ýokary derejeli wekilleri özünde jemleýär. Mundan başga-da, ol senagat, ykjam, himiýa we beýleki ugurlarda öňdebaryjy ýolbaşçylary bir ýere jemleýär.

Konferensiýanyň resmi sahypasy ceraweek.com-da bellenilişi ýaly, bu esasy çäre dünýäniň täze energetika gadam basýan döwründe ileri tutulýan ugurlar boýunça gepleşikler geçirmek üçin 80 ýurtdan 2 050 kompaniýany, jemi 10 müňden gowrak gatnaşyjyny özünde jemleýär. Forumda 450-den gowrak ýokary derejeli ýolbaşçy, 80 ministr we beýleki ýokary derejeli resmiler hem-de 325 habar beriş serişdeleriniň wekilleri gatnaşýar.

CERAWeek 2025 “Öňe tarap: çylşyrymly dünýä üçin energetika strategiýalary” temasyna bagyşlanyp, energetika howpsuzlygynyň, üpjünçiligiň, howa maksatnamalarynyň hem-de bazarlaryň, infrastrukturalaryň, syýasat ugurlarynyň we tehnologiýalaryň geljegine üns berer. Şeýle-de, EA bu ulgamlara täsiri we onuň energetika pudagyna girizýän täzelikleri ara alnyp maslahatlaşylar. CERAWeek dürli programmalar we platformalar arkaly bu meseleleriň biri-biri bilen baglanyşygyny görkezýär hem-de energetikany özgertjek hyzmatdaşlyk modellerini tanyşdyrýar.

CERAWeek üç esasy platformadan ybarat: Executive Conference, Innovation Agora, Partner Programs. Senagatyň öňdebaryjy ýolbaşçylary gatnaşyklary ösdürmek we düýpli täsir ýetirýän pikirleri paýlaşmak üçin jemlenýärler. Çäräniň maksatnamalary geljegiň energetika, daşky gurşaw we howa bilen baglanyşykly meselelerine täze pikirleri we çözgütleri öňe sürmäge gönükdirilendir.

Guramaçylaryň maglumatlaryna görä, forumyň ilkinji güni durnukly gelejek üçin ylym, täzelikler we döwlet syýasaty esasy tema bolar. Üç sany täsirli ýolbaşçy howanyň üýtgemegi, durnuklylyk, ylymlaryň utgaşdyrylmagy we jemgyýetçilik garaýyşlaryny emele getirmekde netijeli aragatnaşyk ýaly möhüm meseleleri ara alyp maslahatlaşar.

Plenar mejlisde «Gipergerimli ykdysadyýet: EA üçin energiýa, energiýa üçin EA» temasy hem ara alnyp maslahatlaşylar. Bu ýerde «maglumat işläp taýýarlamak merkezleriniň senagat toplumynyň» ösüşiniň emeli aňy goldamak üçin energiýa bolan islegi nädip şertlendirýändigi ara alnyp maslahatlaşylar.

Ýene bir tema – «Köp tizlikli dünýäde işewürligi alyp barmak» – ösüşiň dürli ugruna we bazar şertlerine uýgunlaşmak meselelerine bagyşlanýar. Şeýle hem degişli ykdysady proýeksiýalar we strategiki pikirler hödürlener. S&P Global-yň bilermenleri dünýä we Ýewropa energetikasyndaky esasy tendensiýalar baradaky gözlegleri we pikirleri bilen paýlaşarlar.

Plenar maslahatlaryň dowamynda aşakdaky meseleler hem ara alnyp maslahatlaşylar: bahalaryň, söwdanyň we bäsdeşligiň özara baglanyşygy, energetika howpsuzlygynyň häzirki we geljekki meseleleri, global söwda we senagat syýasaty. Emeli aňyň mümkinçiliklerine aýratyn üns berilýär, ol energiýa netijeliligini ýokarlandyrýan, önümçiligi gowulandyrýan we gaýtadan dikeldilýän çeşmeleri integrirleýän innowasion çözgütler arkaly energetika pudagynda öwrülişik döredýär.

Ara alnyp maslahatlaşylýan temalaryň giň gerimi: «Geljegiň maýa goýum strategiýalary», «Energetika ulgamyndaky maýa akymlary», «Bütindünýä haryt bazarynyň hereketlendirijileri», «Howanyň üýtgemegi: ileri tutulýan ugurlar haýsylar?», «Emeli aňyň öwrülişi: guramalaryň ähli ugurlar boýunça özgertmeleri», «Kritiki minerallar: üpjünçilik howpsuzlygynyň täze modeli», «Aziýa geljegiň energetika bazarlaryny nähili emele getirýär».

Bilermenler syýasatyň, maliýe we tehnologiýalaryň energetika pudagy bilen aragatnaşygynyň güýçlenmegini, dünýä gaz bazaryndaky üýtgeýän ileri tutulýan ugurlary, energetika geçişiniň kynçylyklaryny, howa töwekgelçilikleriniň bahalandyrlyşyny we durnuklylyk strategiýalarynyň durmuşa geçirilişini, kritiki minerallaryň üpjünçilik howpsuzlygynyň täze çemeleşmelerini we beýleki möhüm meseleleri ara alyp maslahatlaşarlar.

ORIENT

Foto: spglobal.com