Biz ýakynlaşmagy ugur edinýäris

Türkmenistanyň Belarus Respublikasyndaky Adatdan daşary we Doly ygtyýarly Ilçisi Nazarguly Şagulyýew Wilnýusş şäherine iş saparynyň çäginde Litwa Respublikasynyň Daşary işler ministriniň orunbasary Ýulýus Pranýawiçýus bilen duşuşdy.

Ilçi Şagulyýew Litwanyň diplomatyna türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyndan Litwanyň Prezidenti Gitanas Nauseda iberilen resmi çakylyk hatyny gowşurdy. Çakylykda litwa tarapyny 2025-nji ýylyň Halkara parahatçylyk we ynanyşmak ýyly diýlip yglan edilmegine şeýle hem Türkmenistanyň hemişelik Bitaraplygynyň 30 ýyllygyna bagyşlanyp geçiriljek Halkara forumyna litwa gatnaşmaga çagyrylýar.

Duşuşykda taraplar türkmen-litwa hökümetara iş toparynyň işine ýokary baha berdiler we hyzmatdaşlygy utgaşdyrmakda we ikitaraplaýyn gatnaşyklary ösdürmekde esasy ornuny tassykladylar. Ilçi Şagulyýew söwda we ykdysady gatnaşyklary giňeltmek üçin bar bolan mümkinçiliklere ünsi çekdi we iki ýurduň işewür toparlarynyň arasyndaky gatnaşyklary işjeňleşdirmäge çagyrdy.

Nazarguly Şagulyýew Litwa Respublikasyna iş saparynyň dowamynda, GDA ýurtlaryna, Ýewropa we Aziýa deňiz portlary arkaly söwda we logistika boýunça ýöriteleşen “Grudoteka” kärhanasyna baryp gördi we onuň ýolbaşçylary bilen gepleşikler geçirdi. Duşuşykda ýük daşamalaryň netijeliligini ýokarlandyrmak we Türkmenistan bilen Litwanyň arasyndaky söwda gatnaşyklaryny pugtalandyrmakda möhüm ugur hökmünde deňiz logistika infrastrukturasyny ösdürmek meselesi, port hyzmatdaşlygynyň möhüm taraplary ara alnyp maslahatlaşyldy.

Mundan başga-da, ilçi Şagulyýew Klaýpeda döwlet deňiz portunyň baş direktory Algis Latakas bilen duşuşdy. Latakas, türkmen diplomatyna portuň işi barada jikme-jik maglumat berdi, Klaýpeda portunyň Baltika deňziniň gündogar kenarýakasyndaky Litwanyň iň uly ulag merkezi bolan Gündogar bilen Günbataryň arasyndaky deňiz we gury ýer ugurlaryny baglanyşdyrýan öňdebaryjy doňmaýan portlaryň biridigini belledi. Baş direktor portuň dürli maksatly ýük akymlaryny netijeli dolandyrmaga mümkinçilik berýän 33 sany häzirki zaman terminalynyň bardygyny habar berdi. Portuň täsir galdyryjy tehniki aýratynlyklaryny mälim edildi: umumy meýdany 415 gektar, suw meýdany 623 gektar, çuňlugy 14 metre çenli. Bu bolsa has köp tonnaly gämileri kabul etmäge mümkinçilik berýär.

Duşuşygyň ahyrynda ilçi Şagulyýew ykdysady hyzmatdaşlygy çuňlaşdyrmak we ulag pudagynda Türkmenistan bilen Litwa Respublikasynyň arasynda özara peýdaly hyzmatdaşlygy mundan beýläk-de ösdürmek üçin uly geljegiň bardygyna ynam bildirdi.

ORIENT

Foto: Türkmenistanyň Belarusdaky Ilçihanasy tarapyndan üpjin edildi