Biz ýakynlaşmagy ugur edinýäris

3-nji senýabtrda Türkmenistanyň Prezidenti Serdar Berdimuhamedow Hytaý Halk Respublikasyna saparynyň çäklerinde Ikinji jahan urşunda gazanylan ýeňşiň 80 ýyllygynyň hormatyna Pekinde geçirilen dabaraly çärelere gatnaşdy. HHR-iň Başlygy Si Szinpiniň çakylygy boýunça Türkmenistanyň Baştutany Týananmen meýdançasynda geçirilen dabaraly harby ýörişiň hormatly myhmany boldy.

Bu dabaraly ýöriş diňe bir milli gahrymanlaryň ýagty ýadygärligini hatyralamaga ygrarlydygynyň beýany bolman, eýsem Hytaýyň parahatçylyga we onuň ählumumy durnuklylygy üpjün etmekdäki ornunyň nyşany boldy. Agzybirlik we birek-birege hormat goýmak atmosferasynda wekiliýet ýolbaşçylarynyň bilelikde surata düşmek dabarasy boldy.Türkmenistanyň Prezidentiniň şeýle giň gerimli çärä gatnaşmagy iki ýurduň çuňňur dostlukly gatnaşyklarynyň we umumy strategiki maksatlarynyň beýanyna öwrüldi.

Ýokary derejeli dialog: ikitaraplaýyn duşuşyklardan köptaraplaýyn başlangyçlara çenli

Saparyň esasy wakasy HHR-iň Başlygy Si Szinpiniň bilen geçirilen ýokary derejeli gepleşikler boldy. Iki ýurduň ýolbaşçylary syýasatdan we ykdysadyýetden başlap energetika we medeniýete çenli ugurlaryň giň toplumyny öz içine alýan strategiki hyzmatdaşlygyň ösdürilmegine aýratyn üns berdiler. Söhbetdeşligiň dowamynda uzak möhletleýin ösüş üçin ygtybarly esas bolup hyzmat edýän energetika pudagyndaky üstünlikli hyzmatdaşlygy aýartyn bellediler.

Prezident Serdar Berdimuhamedow “ŞHG+” formatyndaky ýokary derejeli giň göwrümli duşuşyga gatnaşdy. Munuň özi bolsa Türkmenistanyň köpugurly daşary syýasatynyň pugtalanýandygyny we onuň sebitiň döwletleri bilen dialogy giňeltmegi maksat edinýändigini tassyklaýan möhüm waka öwrüldi. Şeýle abraýly çärä gatnaşylmagy Türkmenistanyň sebitde durnukly ösüşi üpjün etmekde eýeleýän ähmiýetli ornuny tassyklady.

Bitaraplyk we parahatçylyk döredijilik: hyzmatdaşlygyň binýady

Duşuşygyň çäginde BMG-niň Baş Assambleýasy tarapyndan üç gezek ykrar edilen Türkmenistanyň hemişelik Bitaraplyk derejesiniň halkara gatnaşyklaryny kemala getirmekdäki esasy orny ara alnyp maslahatlaşyldy. Bellenilişi ýaly, onyň Bitaraplyk syýasaty we öňüni alyş diplomatiýasy diňe bir jarnama däl, eýsem parahatçylygy we durnuklylygy ösdürmek üçin täsirli gurallardyr. Türkmenistan gepleşikler üçin bitarap meýdança hökmünde çykyş edip, halkara guramalary bilen hyzmatdaşlygy işjeň ösdürýär. Bu çemeleşme birnäçe başlangyçlarda öz beýanyny tapdy:

Ykdysady diplomatiýa: Türkmenistan — Owganystan — Pakistan — Hindistan gaz geçirijisiniň gurluşygy şeýle hem üstaşyr ulag geçelgesini döretmek boýunça taslamalary ýaly uly göwrümli taslamalary durmuşa geçirilýär. Mysal üçin: Merkezi Aziýany Ýewropa bilen birleşdirýän Owganystan – Türkmenistan – Azerbaýjan – Gruziýa – Türkiýe ugry.

Ekologiýa howpsuzlygy: Türkmenistan suw serişdelerini rejeli peýdalanmak we çölleşmä garşy göreşmek bilen baglanyşykly meseleleri çözmek babatda tagallalary birleşdirmäge çagyrýar. Bu tagallalar hem onuň parahatçylyk döredijilikli syýasatynyň möhüm bölegi bolup durýar.

Gazanylan üstünlikleriň berkidilmegi: gol çekilen resminamalar. Birnäçe möhüm ikitaraplaýyn resminamalara gol çekilmegi saparyň esasy netijeleriniň biri boldy. Bu resminamalar dürli ugurlary öz içine alyp, strategik hyzmatdaşlygy mundan beýläk-de çuňlaşdyrmak we bilelikdäki taslamalary durmuşa geçirmek üçin berk hukuk binýadyny döredýär. Olar parahatçylyk, özara düşünişmek we durnukly ösüş ýörelgelerine, şeýle hem diňe iki ýurduň däl, eýsem tutuş sebitiň gülläp ösüşine gönükdirilen umumy ygrarlylygy şöhlelendirýärler.

Türkmenistanyň Prezidenti, sebitde uzak möhletleýin durnuklylygyň we abadançylygyň binýady goýjak netijeli gepleşikler we berkidilen ylalaşyklar bilen tapawutlanan iş saparynyň maksatnamasyny tamamlap, Pekinden Watanyna ugrady.

ORIENT

Foto: jinantimes.com.cn