ŞHG sammitinde geljegiň tehnologiýalary: Hytaý Týanszin şäherinde robotlary görkezdi Orient

ŞHG sammitinde geljegiň tehnologiýalary: Hytaý Týanszin şäherinde robotlary görkezdi

03.09.2025 | 18:00 |

Hytaýyň Týanszin şäherinde geçirilýän Şanhaý Hyzmatdaşlyk Guramasynyň (ŞHG) sammitiniň çäklerinde gatnaşýanlara we žurnalistlere häzirki zaman robototehnikasynyň gazananlary görkezildi. ŞHG-niň taryhynda iň iri çäre bolan bu sammite dünýäniň 20-den gowrak liderleri hem-de 3 müňden gowrak KHBS-niň wekilleri gatnaşdy. Robotlaryň ulanylmagy adam bilen maşyn enjamlarynyň aragatnaşygynyň netijeli we täsirli bolup biljekdigini görkezmäge mümkinçilik berdi.

Sammitiň metbugat merkezinde birnäçe robot işledi. Rus, hytaý we iňlis dillerinde gepläp bilýän gumanoid Sýaо He žurnalistlere maslahat berdi, tigirli robot Tora bolsa myhmanlara tanslaryny hödürledi. Yssy howada robot-doňdurmaçy Mr. Doue’r çalt hyzmat edip, sargytlary berdi, başarjaň eltip beriji-robot bolsa içilýän suwlary paýlady.

Hyzmat ugurly mümkinçiliklerden başga-da, has ýöriteleşdirilen tehnologiýalar hem görkezildi. Robot-manipulýator hatdatlyk sungatyny görkezdi, lotus şekilli kapsulada ýerleşdirilen dron bolsa awtomobil ýollaryna, elektrik ulgamlaryna gözegçilik etmegiň hem-de ýangyn ojaklaryny ýüze çykarmagyň mümkinçiligini görkezdi.

ŞHG sammitinde robotlaryň ulanylmagy, Hytaýyň dünýä jemgyýetçiligini tehnologiýa babatda täze innowasion işläp taýýarlamalary bilen tanyşdyrmaga gönükdirilen strategiýasynyň aýdyň beýany boldy.

ORIENT