Türkmenistanda ýokary okuw mekdepleriniň talyplarynyň arasynda halkara hukugy boýunça onlaýn olimpiada geçiriler
22.05.2025 | 11:45 |
Halkara ynsanperwer ylymlary we ösüş uniwersiteti ýokary okuw mekdepleriniň talyplaryny «Halkara hukugy» ugrunda geçiriljek onlaýn olimpiada gatnaşmaga çagyrýar. Olimpiada 2025-nji ýylyň 5-nji iýunynda sagat 10:00-da geçiriler.
Her ýokary okuw mekdebi 10-a çenli talyp hödürläp biler. Bäsleşik Halkara ynsanperwer ylymlary we ösüş uniwersitetiniň resmi sahypasynda (https://iuhd.edu.tm/competitions) onlaýn test görnüşinde geçiriler. Test 100 sany köpsanly saýlamaly ýumuşlardan ybarat bolar.
Olimpiadanyň resmi dili: iňlis dili.
Gatnaşmak üçin talyplar we jogapkär mugallymlar 2025-nji ýylyň iýun aýyna çenli web sahypasynda hasaba alynmalydyr. Olimpiadanyň dowamynda aragatnaşyk serişdelerini, elektron enjamalary, okuw gollanmalaryny we beýleki kömekçi serişdeleri ulanmak gadagandyr.
Ýeňijiler şahsy netijeler boýunça toplan ballaryň jemine görä kesgitlener. Bäsleşigiň netijesi boýunça gatnaşyjylaryň 50%-e çenli ýeňiji diýlip yglan ediler we I, II, III derejeli diplomlar bilen sylaglanar.
Bu bäsleşik ynsanperwer ylymlarynyň okadylyş hilini ýokarlandyrmaga, milli bilim standartlaryny dünýä tejribesi bilen sazlaşykly utgaşdyrmaga gönükdirilendir. Häzirki zaman sanly tehnologiýalaryň ulanylmagy ýaş hünärmenleriň bilim we başarnyklaryna adalatly baha bermäge mümkinçilik berer.
Olimpiada häzirki zaman ylmy we amaly meseleleri seljerip bilýän, halkara hukugy boýunça sowatly, ukyply we bilimli täze nesli taýýarlamakda möhüm tapgyr bolmagyna garaşylýar. Bäsleşige gatnaşmak talyplara halkara hukugy ugry boýunça gymmatly tejribe gazanmakda, bilimlerini berkitmekde we hünär taýdan ösüşinde peýdaly bolar.
Olimpiadanyň baş maksady ýokary okuw mekdepleriniň talyplarynyň arasynda dostlukly gatnaşyklary pugtalandyrmak, ylmy maglumat alyş-çalyşlaryny ösdürmek, ýaşlaryň halkara hukugy boýunça çuňňur gyzyklanmasyny artdyrmak we halkara hukuk meselelerini çözmäge taýyn hünärmenleri taýýarlamakdan ybaratdyr.
Bäsleşik häzirki zaman tehnologiýalarynyň ulanylmagy arkaly nazary meseleleri çözmäge bolan gyzyklanmany höweslendirmäge, zehinli ýaşlary ýüze çykarmaga we ýokary okuw mekdepleriniň arasynda sanly platformalaryň üsti bilen hyzmatdaşlygy güýçlendirmäge gönükdirilendir.
Has giňişleýin maglumat we gatnaşmak şertleri Türkmenistanyň Bilim ministrliginiň resmi web sahypasynda ýerleşdirilendir.
Guramaçylyk toparynyň telefon belgisi: +993 65 40 31 22.
ORIENT
