Biz ýakynlaşmagy ugur edinýäris

Türkmenistanyň Türkiýe Respublikasyndaky Baş konsullygy Stambulda brifing çäresini gurnady. Bu çäre 2025-nji ýylyň Halkara parahatçylyk we ynanyşmak ýyly diýip yglan edilmegi hem-de Türkmenistanyň hemişelik Bitaraplygynyň 30 ýyllygynyň bellenilmegi bilen baglylykda ýurduň başlangyçlaryny giňden beýan etmäge gönükdirildi.

Çärä Bahçeşehir uniwersitetiniň ýolbaşçylary, Stambuldaky ýokary okuw mekdepleriniň «Türk dünýäsi» klubynyň wekilleri, türkmen we daşary ýurtly talyplar, şol sanda Azerbaýjan, Özbegistan we Gazagystandan gelen ýaşlar, şeýle hem ýerli metbugat wekilleri gatnaşdylar.

Türkmenistanyň Stambuldaky Baş konsuly Muhammetnur Owezow çykyşynda, Türkmenistanyň Bitaraplygynyň 30 ýyllygy mynasybetli 2025-nji ýylda geçiriljek ýokary derejeli halkara çäreleriniň ähmiýetine ünsi çekdi. Şeýle-de ol, Halkara parahatçylyk we ynanyşmak ýylynyň çäginde Türkmenistanyň öňe sürýän başlangyçlary, şeýle hem ýurduň häzirki ýyl üçin kesgitlän esasy ugurlary baradaky Konsepsiýa bilen gatnaşyjylary tanyşdyrdy.

Brifingiň dowamynda 2025-nji ýylyň aýratyn ähmiýete eýedigi nygtaldy. Ol diňe bir Türkmenistanyň hemişelik Bitaraplygynyň 30 ýyllygy bilen däl, eýsem Birleşen Milletler Guramasynyň döredilmeginiň 80 ýyllygy bilen hem bellenilýän ýyl bolmak bilen, bu döwürde meýilleşdirilen halkara we döwlet derejeli çäreleriň aýratyn manysynyň bardygy beýan edildi.

Çäräniň möhüm pursatlarynyň biri bolsa, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan ýazylan «Hakyda Göwheri» atly täze kitabyň tanyşdyrylyşy boldy.

Stambulda geçirilen brifing parahatçylyk we ynanyşmak ýörelgelerini ilerletmek, şeýle hem halkara jemgyýetçiligini Türkmenistanyň içerki we daşarky syýasatynyň esasy ugurlary bilen tanyşdyrmak üçin möhüm meýdança öwrüldi.

Foto: mfa.gov.tm