Biz ýakynlaşmagy ugur edinýäris

Şu gün, 17-nji martda, Aşgabatda Türkmenistanyň Senagatçylar we telekeçiler birleşmesiniň (TSTB) döredilmeginiň 17 ýyllygyna bagyşlanan sergi dabaraly ýagdaýda açyldy.

Bu çäre milli telekeçiligiň üstünlikleriniň aýdyň beýany bolup, geçen ýyllarda ýurduň ykdysadyýetiniň ösmegine, döwlet maksatnamalarynyň durmuşa geçirilmegine we hususy pudagyň berkemegine goşan uly goşandyny görkezýär.

Serginiň ilkinji pursatlaryndan başlap, myhmanlar işewürlik ruhunyň we innowasiýanyň joşgunly gurşawyna aralaşdylar. Ýüzlerçe gatnaşyjy – öňdebaryjy türkmen kompaniýalary we telekeçiler – öz gazananlaryny we iň täze işläp taýýarlamalaryny giňden hödürleýärler.

Bu ýerde dokma we azyk senagatynyň önümlerini, gurluşyk materiallaryny, häzirki zaman tehnologiýalaryny we innowasion hyzmatlary görmek bolýar. Olaryň ählisi milli telekeçiligiň depginli ösüşini açyp görkezýär.

Serginiň çäklerinde diňe bir önümler we hyzmatlar görkezilmän, eýsem, 18-nji martda «Ýyldyz» myhmanhanasynda «Türkmenistanyň geljegine maýa goýumlar» atly halkara forum hem geçiriler. Bu çäre işewür toparlaryň we maýadarlaryň geljekki taslamalary ara alyp maslahatlaşmak, eksport mümkinçiliklerini giňeltmek hem-de halkara hyzmatdaşlygyny berkitmek maksady bilen duşuşmagyna şert döreder.

Sergi 19-njy marta çenli dowam eder we ýurduň ykdysady ösüşine aýratyn goşant goşan kompaniýalaryň sylaglanmagy bilen jemlener.

ORIENT

Foto: orient.tm