«Eho Ýewraziýa-Kinofest» kinoforumy, «Ýewraziýa» awtonom täjirrçilik däl guramasy tarapyndan gurnalan çärä, 11-13 mart aralygynda Ýerewanda geçirildi diýip, Sputnik Armenia habar berýär. Multimedia metbugat merkezinde geçirilen ýygnakda, «Ýewraziýa» guramasynyň medeni gatnaşyklar we halkara taslamalar bölüminiň ýolbaşçysy Wýaçeslaw Matweýçuk bu ýyl kinoforumyň eýýäm Gyrgyzystanda we Abhaziýada guralandygyny, Ýerewandan soň bolsa Minsk şäherinde dowam etdiriljekdigini aýtdy. Festiwalyň maksatnamalaýyn direktory Aleksandra Žukowa her bir şäherdäki kinoforumyň maksatnamasynyň üýtgeşikdigini belläp geçdi. Film görkezilişlerinden başga-da, pikir alyşmalar, tegelek stollar we ussatlyk sapaklary guralýar.

Bu kinoforum kinematografiýa bilen gyzyklanýan adamlary birleşdirýär we Soçide geçiriljek indiki kinofestiwala taýýarlyk hökmünde hyzmat edýär. Çäräniň çäginde 2024-nji ýylyň oktýabr aýynda Moskwada geçirilen «Ýewraziýa-Kinofest» festiwalynyň ýeňiji filmleri görkezilýär. Şol festiwala 18 ýurtdan 250-den gowrak kinematografiýa hünärmeni we bilermeni gatnaşdy.

Ýerewandaky metbugat ýygnagynda Soçide geçiriljek ikinji «Ýewraziýa-Kinofest» boýunça işleriň işjeň alnyp barylýandygy habar berildi. Festiwal 6-13 iýul aralygynda geçiriler. Şu ýyl onuň geografiýasy giňeldilip, ÝYB ýurtlaryndan başga-da, BRIKS ýurtlaryndan hem filmler maksatnama girizildi.

Kinoforumyň esasy maksady — post-sowet giňişliginde integrasiýa proseslerini güýçlendirmek bilen birlikde halklaryň milli aýratynlyklaryny gorap saklamak, tomaşaçylaryň öz ýurtlarynyň taryhyna, däp-dessurlaryna we medeni gymmatlyklaryna bolan gyzyklanmalaryny artdyrmak, şeýle hem täze we zehinli kinematograflary ýüze çykarmak we olara hünär taýdan goldaw bermek bolup durýar. Şeýle-de, kinoforumyň çäklerinde hödürlenýän eserler ruhy we estetiki täzeligi özünde jemleýär.