Biz ýakynlaşmagy ugur edinýäris

Türkmenistanyň Saglygy goraýyş we derman senagaty ministrliginiň binasynda “Saglyk” Döwlet maksatnamasy hereketde” ady bilen ylmy-amaly maslahat geçirildi. “Saglyk” Döwlet maksatnamasynyň kabul edilmeginiň 30 ýyllygy mynasybetli guralan çäre saglygy goraýyş ulgamynyň düzümleriniň, saglygy goraýyş müdirlikleriniň ýolbaşçylary hem-de wekilleri, jemgyýetçilik guramalarynyň agzalary, Myrat Garryýew adyndaky Türkmenistanyň Döwlet lukmançylyk uniwersitetiniň professor-mugallymlary, talyplar gatnaşdylar.

“Saglyk” Döwlet maksatnamasynyň üstünlikleri we ugurlary

Maslahat, türkmen halkynyň Milli Lideri tarapyndan başy başlanan “Saglyk” Döwlet maksatnamasynyň maksatlarynyň üstünlikli durmuşa geçirilişini ara alyp maslahatlaşmak üçin meýdança boldy. Esasy üns lukmançylyk edaralarynyň işini kämilleşdirmeklige, ilat üçin lukmançylyk hyzmatlarynyň hilini we elýeterliligini ýokarlandyrmaga berildi. Gatnaşanlar döwletiň saglygy goraýyş ulgamynyň maddy we tehniki binýadyny berkitmek üçin hemişe maýa goýýandygyny we halkara hyzmatdaşlygyny işjeň ösdürýändigini nygtadylar.

Binanyň eýwanynda ýurduň lukmançylygynda gazanylan üstünliklerini görkezýän sergi guraldy. Eksponatlaryň arasynda – häzirki zaman lukmançylyk enjamlary we ýerli derman ösümlikleriniň önümleri bar. Türkmenistanyň Halk Maslahatynyň Başlygy Gurbanguly Berdimuhamedowyň “Türkmenistanyň dermanlyk ösümlikleri” atly köp jiltli ylmy-ensiklopedik kitaplary sergide aýratyn orun eýeledi. Bu kitaplar halkara derejesinde ykrarnamalara eýe boldy.

Häzirki zaman lukmançylygy we sagdyn durmuş ýörelgesi

Ýurduň ähli künjeklerinde, şol sanda Aşgabat we Arkadag şäherlerinde ýokary halkara standartlaryna laýyk gelýän lukmançylyk merkezleriniň hereket etýändigi, olaryň birnäçesiniň bolsa halkara şahadatnamalaryna eýe bolandygyny bellediler. Ýöriteleşdirilen klinikalar, anyklaýyş toplumlary we Enäniň we çaganyň saglygyny goraýyş ylmy-kliniki merkezleri ýaly şeýle edaralar öňdebaryjy dünýä öndürijileriniň enjamlary bilen enjamlaşdyrylandyr. Munuň özi bolsa hyzmatlaryň ýokary hilini şertlendirýär.

Türkmenistan saglygy goraýyş ulgamynda ösen tehnologiýalary we sanly ulgamy işjeň ornaşdyrýar we lukmanlaryň hünär derejesini ýokarlandyrmak üçin şol sanda dünýäniň öňdebaryjy klinikalarynda tejribe geçmek üçin ähli şertleri döredýär. Paýtagtyň günorta böleginde, häzirki zaman lukmançylyk edaralarynyň toplumy we şol sanda Şikesleri bejeriş halkara merkezi döredildi.

Şeýle hem, döwlet sagdyn durmuş ýörelgelerini berkitmäge, ilatyň, esasanam ýaşlaryň bedenterbiýä we sporta işjeň çekilmegine uly ähmiýet berýär.

Zähmetiň we geljek üçin maksatnamalaryň ykrar edilmegi

Maslahatyň ahyrynda saglygy goraýyş ulgamynyň ösdürilmegine ähmiýetli goşant goşan tapawutlanan lukmanlara we hünärmenlere Türkmenistanyň Prezidentiniň adyndan gymmat bahaly sowgatlar gowşuryldy. Şeýle hem bu ýerde ýurt boýunça geçirilen “Iň gowy hassahana” atly bäsleşigiň jemleri jemlenildi.

Türkmenistanyň saglygy goraýyş ulgamynyň mundan beýläk-de ösdürilmegi innowasion enjamlaryň ornaşdyrylmagyna, lukmançylyk işgärleriniň hünär derejesini ýokarlandyrmaga we lukmanlara iň täze lukmançylyk tehnologiýalaryny netijeli özleşdirmäge mümkinçilik berjek halkara gatnaşyklaryny işjeň ösdürilmegine gönükdiriler.

ORIENT

Foto: orient.tm