Biz ýakynlaşmagy ugur edinýäris

13-nňji iýulda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow guramaçylyk döwlet toparynyň BMG-niň Deňze çykalgasy bolmadyk ösüp barýan ýurtlar boýunça üçünji maslahatyny (LLDC3) geçirmäge bagyşlanan maslahatyny geçirdi. Bu dünýä derejesindäki halkara forumy 2025 ýylyň 4 – 8-nji awgusty aralygynda “Awaza” milli syýahatçylyk zolagynda geçiriler.

Onda halkara maslahaty we onuň çäklerinde guraljak ugurdaş çäreleri ýokary guramaçylyk derejesinde geçirmek bilen bagly meselelere seredildi hem-de şu wagta çenli bu ugurda ýerine ýetirilen işlere baha berlip, öňde duran wezipeler kesgitlenildi.

Maslahata Hökümet agzalary, ministrlikleriň, pudaklaýyn dolandyryş edaralarynyň ýolbaşçylary gatnaşdylar. Bu bolsa taýýarlygynyň döwlet derejesindäki häsiýetini nygtaýar.

Ählumumy derejede ykrar edilmegi we halkara gün tertibi

Gatnaşyjykara ýüzlenip, Gurbanguly Berdimuhamedow BMG-niň Baş Assambleýasynyň 79-njy sessiýasynyň şu ýylyň 11-nji aprelinde geçirilen 63-nji plenar mejlisinde bu maslahatyň Türkmenistanda geçirilmegi bilen bagly degişli Kararnamanyň kabul edilendigini belledi. Bu kararnama dünýäniň 57 döwleti awtordaş hökmünde çykyş etdi. Munuň özi bolsa Türkmenistanyň halkara derejesindäki abraýynyň we ählumumy hyzmatdaşlygyň ösüşindäki ornunyň ykrar edilmeginiň aýdyň görkezijisidir.

Şeýle uly göwrümli çäräniň ýokary derejede guramaçylykly geçirilmegini üpjün etmek üçin Prezidenti Serdar Berdimuhamedow 4-nji iýulda “Birleşen Milletler Guramasynyň Deňze çykalgasy bolmadyk ösüp barýan ýurtlar boýunça üçünji maslahatyny geçirmek hakynda” Karara gol çekdi. Mundan başga-da Türkmenistanyň Hökümeti bilen Birleşen Milletler Guramasynyň arasynda bu maslahaty geçirmek babatda Ylalaşyga gol çekildi. Bu bolsa BMG bilen ýakyn hyzmatdaşlygy tassyklaýar.

Öňde boljak forumyň göwrümi we formaty

Gurbanguly Berdimuhamedow öňümizdäki wakalaryň deňi-taýy bolmadyk gerimine ünsi çekdi. Bäş günläp dowam etjek halkara forumyň çäklerinde syýasy-diplomatik, söwda-ykdysady we medeni-ynsanperwer ugurly köp sanly çäreler geçiriler.

Deňze çykalgasy bolmadyk ösüp barýan ýurtlaryň düzümine girýän 32 döwletiň hem-de BMG-niň gyzyklanma bildirýän beýleki agza ýurtlarynyň wekilleriniň, Birleşen Milletler Guramasynyň Baş sekretarynyň we onuň orunbasarlarynyň gatnaşmagyna garaşylýar. Şeýle hem birnäçe halkara, sebit guramalarynyň, kanun çykaryjy edaralaryň, maliýe institutlarynyň, jemgyýetçilik birleşikleriniň hem-de hususy pudagyň ýolbaşçylarynyň we wekilleriniň gelmegine garaşylýar.

Geçiriljek çäreler toplumy 7 esasy ugry öz içine alýar:

• Halkara maslahatyň açylyş we ýapylyş dabaralaryny hem-de plenar mejlisleri.

• Ýokary derejedäki 5 sany tematik “tegelek stollary”.

• Ýokary derejedäki 7 sany forum: “Günorta-Günorta” hyzmatdaşlygy boýunça ministrler duşuşygy, parlament forumy, hususy pudagyň forumy, raýat jemgyýetiniň forumy, ýaşlar forumy, zenan ýolbaşçylaryň duşuşygy, arabaglanyşyk boýunça çäre.

• Maslahata gatnaşýan döwletler hem-de halkara guramalar we edaralar tarapyndan geçiriljek çäreleri, şol sanda türkmen tarapynyň ýerüsti ulag we arabaglanyşyk, Halkara parahatçylyk we ynanyşmak ýyly, ýaşlar syýasaty, durnukly energetika, sirkulýar ykdysadyýet bilen baglanyşykly gurajak ugurdaş çäreler.

• Tematik sergileri.

• Merkezi Aziýa ýurtlarynyň milli günlerini we dabaraly konsertler.

• Türkmenistanyň Hökümetiniň adyndan maslahata gatnaşyjylaryň hormatyna guraljak resmi naharlar.

Giňişleýin taýýarlyk: infrastrukturadan myhmansöýerlige çenli

Duşuşykda guramaçylygyň iň ýokary derejesini üpjün etmek üçin anyk wezipeler kesgitlenildi:

• Türkmenistanyň Prezidentiniň Kararyndan we BMG bilen gol çekilen Ylalaşykdan gelip çykýan wezipeleriň ýerine ýetirilişini berk gözegçilikde saklamagy;

• Türkmenbaşy şäherinde, Türkmenbaşy Halkara howa menzilinde we “Awaza” milli syýahatçylyk zolagynda alnyp barylýan gurluşyk-gurnama, abadanlaşdyrmak, abatlamak, arassalamak we gök zolaklara ideg etmek işlerini ýakyn günlerde tamamlamagy;

• BMG-niň Sekretariaty bilen bilelikde halkara maslahatyň açylyş we ýapylyş dabarasynyň maksatnamasyny taýýarlamagy;

• Ýokary derejedäki tematik “tegelek stol” mejlislerine we foruma gatnaşjak türkmen wekiliýetiniň düzümini kesgitlemegi;

• Türkmen tarapyndan guraljak ugurdaş çäreleriň (jogapkär Söwda-senagat edarasyny) bellemegi, sergileriniň şeýle hem Merkezi Aziýa ýurtlarynyň milli günleriniň çäklerinde guraljak medeniýet we sungat ussatlarynyň dabaraly konsertiniň konsepsiýasyny we maksatnamasyny taýýarlamagy tabşyryldy;

• Myhmanlaryň howa menzilinde türkmen halkynyň myhmansöýerlik däplerine laýyklykda garşylanylmagyny üpjün etmegi, wekiliýet ýolbaşçylaryny howa menzilinde garşylajak Türkmenistanyň resmi wekillerini kesgitlemek, myhmanlary garşylamak üçin Türkmenistanyň Daşary işler ministrliginiň welaýatlardaky wekilhanalary degişli guramaçylyk işlerini guramak;

• Şäher bezeginiň we köçeleriň abadanlaşdyrylmagynyň üpjün edilmegini, çäreleriň geçirilýän döwründe ulanyljak köçeleriň ugrunda we döwrebap enjamlarda görkeziljek şygarlardyr şekilleri kesgitlemek, yşyklandyryşy aýratyn gözegçilikde saklamagy;

• Daşary ýurtly wekiliýetleri myhmanhanalarda ýerleşdirmek we ýokary derejede hyzmat etmek üçin zerur şertleri döretmegiň, olarda lukmançylyk we söwda nokatlarynyň talabalaýyk işlemegini üpjün edilmegi;

• Çäräniň dowamynda ulanyljak ähli ulag serişdeleriniň tehniki ýagdaýynyň gözden geçirilmegini we talabalaýyk bolmagyny üpjün etmegiň, “Tiz kömek” awtoulaglarynyň nobatçylyk etmek meselesine seretmegiň, awtobus gatnawlarynyň rejeli ýola goýulmagy bilen bagly bitewi ulgamyň işlenip düzülmegi bellenildi.

• Iýmit üpjünçiligi meselesini: Türkmenistanyň Söwda we daşary ykdysady aragatnaşyklar ministrligi, Söwda-senagat edarasy we Azyk senagaty döwlet birleşigi bilen bilelikde bu ugurda degişli taýýarlyk-guramaçylyk işlerini geçirmegi kesgitledi;

• Lukmançylyk hyzmatlary we howpsuzlyk: ýokary lukmançylyk hyzmatlaryny üpjün etmek we jemgyýetçilik tertip-düzgüniniň, howpsuzlygyň berjaý edilmeginiň gözegçilikde saklanylmagy bellenildi.

Ministrler Kabinetiniň Başlygynyň orunbasary, daşary işler ministri Raşid Meredow ýerine ýetirilen işler, forumyň dolandyryş binasynyň işini, meýletinçileri taýýarlamagyň derejesi barada hasabat berdi.

Ministrler Kabinetiniň Başlygynyň orunbasary Batyr Amanow halkara forumy guramaçylykly geçirmek we bu ugra degişli meseleleri ýokary derejede ýerine ýetirmek boýunça işlenip taýýarlanylan maksatnama barada giňişleýin maglumat berdi. Ministrler Kabinetiniň Başlygynyň orunbasary Bahar Seýidowa halkara forumyň medeni maksatnamasy we onuň çäklerinde guraljak çärelere görülýän taýýarlyk işleri barada maglumat berdi. Gurbanguly Berdimuhamedow, halkara forumyny ýurduň köpçülikleýin habar beriş serişdelerinde giň we ýokary hilli beýan etmegiň zerurdygyna ünsi çekdi hem-de bu işlerini häzirki zamanyň talaplaryna laýyk derejede guramagynyň möhümdigini belledi.

Forumyň çäklerinde guraljak medeni-ynsanperwer çäreleriň, aýratyn-da, Merkezi Aziýa ýurtlarynyň milli günleriniň hormatyna guraljak dostluk konsertiniň, milli tagamlaryň festiwalynyň guramaçylyk derejesine aýratyn üns berler.

Maslahat tamamlanandan soňra, Gurbanguly Berdimuhamedow halkara çärelere gatnaşjak meýletinçiler üçin niýetlenen lybaslary synlady we lukmanlar, teleoperatorlar, hyzmat ulgamyna degişli beýleki işgärler üçin niýetlenen lybaslaryň taýýarlanylmagynda maslahatlaryny berdi.

Şeýle hem türkmen halkynyň Milli Lideri halkara maslahatyň geçiriljek günlerinde ýolagçy awtobuslarynda ýerleşdiriljek ýazgylaryň we şygarlaryň görnüşleri bilen tanyşdy we bu ýazgylaryň halkara forumyň ruhuna laýyk gelmelidigini we olarda şanly wakalaryň taryhy ähmiýetiniň öz beýanyny tapmalydygyny nygtady.

Bu toplumlaýyn çemeleşme, ählumumy hyzmatdaşlygyň we durnukly ösüş ýörelgelerine ygrarlydygyny tassyklaýan şeýle möhüm halkara çäresini guramakda Türkmenistanyň ulgamlaýyn esasda jogapkärçili çemeleşýändigini görkezýär.

ORIENT

Ýene-de tema boýunça

Awazadaky BMG LLDC maslahatyna KHBS akkreditasiýasy açyk

BMG-niň Nýu-Ýorkdaky ştab-kwartirasynda LLDC3 maslahaty boýunça brifing geçirildi

Awaza-2025: Deňze çykalgasy bolmadyk ýurtlaryň ösüşe we hyzmatdaşlyga tarap ýol

Foto: orient.tm