Biz ýakynlaşmagy ugur edinýäris

Aşgabat, 1-nji oktýabr | ORIENT. Türkmenistanyň Prezidenti, Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlisini geçirdi. Onuň dowamynda harby we hukuk goraýjy edaralarda 2025-nji ýylyň dokuz aýynda alnyp barlan işleriň netijelerine giňişleýin seredildi. Bu çäre ýurduň harby we hukuk goraýjy edaralaryň işiniň netijeliligine baha bermekde möhüm tapgyr boldy.

Edaralaryň ýolbaşçylarynyň hasabatlary

Howpsuzlyk geňeşiniň mejlisinde esasy harby we hukuk goraýjy edaralarynyň ýolbaşçylary çykyş etdiler.

Döwlet howpsuzlyk geňeşiniň sekretary, goranmak ministri Begenç Gündogdyýew ýurduň goranyş ukybyny pugtalandyrmak boýunça ýerine ýetirilen işler barada hasabat berdi. Milli goşunyň düzümlerine häzirki zaman tehnologiýalary şeýle hem – sanly ulgamy ornaşdyrmaga, harby gullukçylaryň gulluk we ýaşaýyş-durmuş şertlerini gowulandyrmaga we Garaşsyzlygyň 34 ýyllygy mynasybetli geçirilen dabaraly harby ýörişiň üstünlikli geçirilendigine aýratyn üns berildi.

Baş prokuror Begmyrat Muhamedow kadalaşdyryjy hukuk namalarynyň talabalaýyk berjaý edilişini üpjün etmek maksady bilen görlen toplumlaýyn çäreler hem-de prokuror gözegçiliginiň we prokuratura edaralaryny ösdürmegiň maksatnamasynyň ýerine ýetirilişi barada hasabat berdi.

Içeri işler ministri Muhammet Hydyrow jemgyýetçilik düzgün-tertibini üpjün etmek, hukuk bozulmalarynyň öňüni almak boýunça ýerine ýetirilen işler we “Ýol hereketiniň howpsuzlygy — ömrümiziň rahatlygy” atly geçirilen biraýlygyň jemleri barada giňişleýin hasabat berdi.

Ýokary kazyýetiň başlygy Begenç Hojamgulyýew kazyýet işini kämilleşdirmek, bu ugurda sanly ulgamy, öňdebaryjy tejribäni ornaşdyrmak babatda görülýän çäreler we işgärleriň hünär derejesini ýokarlandyrmak boýunça geçirilen işler barada hasabat berdi.

Milli howpsuzlyk ministri Nazar Atagaraýew milli howpsuzlygy üpjün etmek hem-de bähbitlerini ygtybarly goramak, milli howpsuzlyk edaralarynyň işini kämilleşdirmek boýunça alnyp barylýan işler barada hasabat berdi.

Döwlet serhet gullugynyň başlygy Ýazgeldi Nuryýew döwlet serhetlerini goramak boýunça durmuşa geçirilen işler serhet goşunlarynyň maddy-tehniki binýadyny döwrebaplaşdyrmak boýunça alnyp barylýan işler barada hasabat berdi.

Adalat ministri Meretgeldi Taganow milli kanunçylyk binýadyny kämilleşdirek we ilata hukuk kömegi bermek boýunça ýerine ýetirilen işleriň netijeleri boýunça hasabat berdi.

Döwlet gümrük gullugynyň we Döwlet migrasiýa gullugynyň başlyklary ýolbaşçylyk edýän düzümleriniň işini döwrebaplaşdyrmak we öňdebaryjy tejribäni işjeň ornaşdyrmak maksady bilen görülýän çäreler barada hasabat berdiler.

Kabul edilen çözgütler

Türkmenistanyň Prezidenti, Ýaragly Güýçleriniň Belent Serkerdebaşysy goşun generaly Serdar Berdimuhamedow mejlisiň dowamynda ýurduň welaýatlarynyň täze etraplarynda harby we hukuk goraýjy edaralaryň degişli düzümlerini döretmek we dowamynda prokurorlary wezipä bellemek hakynda resminamalara gol çekdi.

Harby we hukuk goraýjy edaralaryň ýolbaşçylaryna mundan beýläk-de maddy-tehniki binýadyny has döwrebaplaşdyrmak we işgärleriniň hünär derejesini ýokarlandyrmak barada görkezmeler berildi.

Şeýle hem aýratyn tabşyryklar berildi. Hususan-da, döwlet Baştutany Döwlet howpsuzlyk geňeşiniň sekretary, goranmak ministri B.Gündogdyýewe raýatlary harby gulluga çagyrmak we harby gullukdan boşatmak boýunça häzirki wagtda dowam edýän işleriň guramaçylykly geçirilmegine berk gözegçilik etmegi tabşyrdy.

Harby gullukçylaryň gulluk we ýaşaýyş-durmuş şertlerini gowulandyrmaga aýratyn üns berildi. Türkmenistanyň Prezidenti goranyş häsiýetine eýe bolan Harby doktrinasyna laýyklykda Garaşsyz Bitarap döwletiň howpsuzlygyny üpjün etmegiň möhümdigini nygtady.

Ösüşiň mümkinçilikleri

Harby we hukuk goraýjy edaralarynyň ýolbaşçylary döwlet Baştutanyny abadançylygy, asudalygy ugrunda bellenen wezipeleri ýerine ýetirmäge taýýardyklaryny ynandyrdylar. Şeýle hem degişli düzümleriň işini has-da kämilleşdirmek, innowasion tehnologiýalaryny ornaşdyrmak hem-de harby we hukuk goraýjy edaralarynyň netijeliligini ýokarlandyrmak boýunça meýilnamalar beýan edildi.

Prezident Serdar Berdimuhamedow mejlisiň ahyrynda oňa gatnaşyjylary Garaşsyzlynyň 34 ýyllygy mynasybetli dabaraly harby ýörişiň üstünlikli geçirilmegi bilen tüýs ýürekden gutlady. Şeýle hem başga-da birnäçe meseleler boýunça çözgütler kabul edildi.

Bu mejlis Türkmenistanyň harby we hukuk goraýjy edaralarynyň ösüşinde möhüm tapgyra eýe boldy we geljek döwür üçin olaryň alyp barjak işleriniň esasy ugurlaryny kesgitledi.

Foto: Türkmen TV