Xiaomi Xring O1 flagman çipi we Xiaomi 15S Pro smartfony bilen tanyşdyrdy
22.05.2025 | 18:27 |
Şu gün Xiaomi kompaniýasy özüniň täze flagman ýekeçipli ulgamyny — Xring O1-i resmi taýdan hödürledi we şol bir wagtyň özünde bu çipiň esasynda gurlan ilkinji smartfon — Xiaomi 15S Pro bilen tanyşdyrdy.
TSMC tarapyndan 3-nanometrli tehnologiki proses boýunça öndürilen Xring O1 çipseti ýokary öndürijiligi bilen Qualcomm Snapdragon 8 Elite we MediaTek Dimensity 9400 ýaly bazaryň öňdebaryjy modelleri bilen bäsleşip bilýär. Ol 10 ýadroly dörtklasterli merkezi prosessory we 16 ýadroly Immortalis-G925 grafik tizlendirijisini öz içine alýar.
Xiaomi 15S Pro smartfony öňdebaryjy OLED ekrana eýe bolup, onuň diagonaly 6,73 dýuým, çözgüdi 3200 x 1440 piksel we täzelenme ýygylygy 120 Hz-den uýgunlaşýan görnüşde bolup durýar. Gözüň rahatlygy üçin 1920 Hz ýokary ýygylykly PWM sazlamasy girizilen. Ekran berkleşdirilen Xiaomi Dragon Crystal Glass 2.0 aýnasy bilen goralan, aşagynda bolsa ultrases barmak yzyny tanamak skaneri ýerleşýär. Kamera mümkinçiliklerine degişlilikde, smartfon üç sany 50 megapikselli sensorly Leica kamerasy bilen enjamlaşdyrylandyr.
Enjamyň awtonomlygyny 6100 mAý batareýa üpjün edýär, ol 90 W tizlikdäki simli we 50 W simsiz çalt zarýad bermegi goldaýar. Xiaomi 15S Pro-nyň beýleki möhüm aýratynlyklarynyň hatarynda IP68 derejesindäki suw we tozan goragy, UWB we Wi-Fi 7 tehnologiýalarynyň goldawy, IR şöhlelendirijisi, USB 3.2 Gen 1 porty, stereo gürleýjiler, dört mikrofon we güýçli wibrasiýa motory bellärliklidir.
ORIENT
