Türkmenistan “Interwideniýe” aýdym-saz bäsleşigine gatnaşmakçy
19.05.2025 | 17:25 |
"Interwideniýe” aýdym-saz bäsleşigi 20-nji sentýabrda Moskwadaky Live Arenada geçiriler diýip, RBC Life “Birinji kanalyň” metbugat gullugyna salgylanyp habar berýär. Bu, 1960-njy ýyllaryň ahyryndan başlap sosialistik lageriň Ýewropa ýurtlarynda geçirilen aýdym-saz bäsleşiginiň gaýtadan dikeldilen görnüşidir. Şol bir wagtda bu bäsleşige Kanada, Ispaniýa, Portugaliýa we Marokko ýaly dünýäniň dürli ýurtlary hem gatnaşyp bilýärdiler. Sosialistik lager dargandan soň, “Interwideniýe” bäsleşigi hem togtadylýar. 2025-nji ýylyň fewral aýynda Russiýanyň Prezidenti bu aýdym-saz bäsleşigini dikeltmek barada permana gol çekdi. Guramaçylyk komitetiniň başlygy wezipesine wise-premýer Dmitriý Çernyşenko, gözegçilik geňeşiniň başlygynyň wezipesine bolsa Prezidentiň administrasiýasynyň başlygynyň birinji orunbasary Sergeý Kiriýenko bellenildi.
Guramaçylaryň maglumatyna görä, bäsleşige BRİKS, ŞHG we GDA ýurtlaryndan, şeýle-de Latyn Amerikasy bilen Merkezi Aziýanyň döwletlerinden gatnaşyjylary çekmek meýilleşdirilýär. Häzirki wagtda takmynan 20 döwlet bu bäsleşige gatnaşmaga gyzyklanma bildirdi. Russiýadan başga-da, jemleýji tapgyra azyndan 14 ýurt gatnaşyp biler.
Bäsleşigiň resmi saýtynda festiwala gatnaşmaga isleg bildirýän ýurtlaryň sanawy ýerleşdirilen. Olaryň arasynda: Azerbaýjan, Ermenistan, Belarus, Braziliýa, Müsür, Hindistan, Eýran, Gazagystan, Katar, Gyrgyzystan, Hytaý, Kuba, BAE, Pakistan, Saud Arabystany, Täjigistan, Taýland, Türkmenistan, Özbegistan we Günorta Afrika Respublikasy bar. Russiýadan we Gyrgyzystandan gatnaşjak artistleriň atlary hem belli boldy — olar sahna ady Shaman bilen tanalýan Ýaroslaw Dronow we NOMAD üçlügi.
Saýtda şeýle hem Bolowiýa, Wengriýa, Wenesuela, Kolumbiýa, Meksika, Serbiýa, Slowakiýa we Efiopiýa ýaly ýurtlaryň hem gatnaşyp, öz aýdymlaryny hödürläp biljekdigi görkezilýär. Bu döwletleriň gatnaşmagy taslamanyň çäginde göz öňünde tutulýar.
