Biz ýakynlaşmagy ugur edinýäris

6-njy awgustda LLDC3 Ýaşlar forumynyň çäklerinde ýaşlar syýasatyna bagyşlanan çäre geçirildi. Ol «Ýaşlar syýasaty işde: LLDC ýurtlary üçin sebit liderligini we strategik maýa goýumlaryny berkitmek» adyny aldy. Forumyň maksady — deňze çykalgasy bolmadyk ýurtlaryň (LLDC) durmuşynda ýaşlaryň geljekki gatnaşygyny ara alyp maslahatlaşmak.

Çärä döwlet edaralarynyň, BMG ulgamynyň wekilleri, şeýle hem ýaşlar we raýat jemgyýeti guramalarynyň ýolbaşçylary gatnaşdylar. Maslahatlaşmany Euronews halkara habarlar ýaýlymynyň žurnalisti Laura Bakwell alyp bardy. Onuň tejribesi söhbetdeşlige aýratyn depgin we many berdi.

Arkadagdan Awaza çenli: ýaşlar dialogynyň giňelmegi

Arkadagda sebit başlangyjy hökmünde başlanan dialog täze derejä çykdy. Nýu-Ýorkdaky BMG-niň ştab-kwartirasynda geçirilen duşuşykda halkara itergisini alan bu dialog indi Awazada geçirilen Ýaşlar forumynda hem dowam etdi we dünýäniň dürli künjeklerinden ýaş liderleri birleşdirdi. Bu ýol diňe bir geografiki däl, eýsem institusional taýdan hem güýçlenmegi alamatlandyrýar we ony LLDC ýaşlary üçin möhüm global platforma öwürýär.

Forumyň Awazada geçirilen mejlisiniň gatnaşyjylary demografik üstünligiň durnukly ösüşiň esasy bolandygyny nygtadylar.

Esasy pikirler we garaýyşlar

Çäräniň dowamynda çykyş eden ýokary wezipeli wekilleriň pikirleri geljekki başlangyçlara esas boldy:

•Azat Ataýew, Türkmenistanyň bilim ministriniň orunbasary, demografik seljermä esaslanyp ykdysady syýasatyň gurallaryny institusional taýdan berkitmegiň zerurdygyny aýtdy. Ol ýaşlaryň mümkinçiliklerini döredijilik pudaklaryna ugrukdyrmagy teklip etdi, bu bolsa durnukly ykdysady ösüşe ýardam berer.

• Kaha Imnadze, BMG-niň öňüni alyş diplomatiýa boýunça sebit merkeziniň ýolbaşçysy, ýaşlarda parahatçylyk we ynanyşmak gymmatlyklaryny ösdürmegiň möhümdigini belledi. Ol özara düşünişmegi we jebisligi güýçlendirmek üçin Öňüni alyş diplomatiýa akademiýasyny döretmegini teklip etdi.

• Kemal Goşliýew, BMG-nyň Ilat gaznasynyň (UNFPA) Türkmenistandaky edaranyň ýolbaşçysy, netijeli demografik syýasatyň LLDC ýurtlary üçin strategiki çeşme bolup durýandygyny nygtady.

• Felipe Paulýer, BMG-niň Baş sekretarynyň ýaşlar işleri boýunça kömekçisi, we Fransua-Ksawýe Batalingaýa, BMG-niň Çad döwletindäki hemişelik utgaşdyryjysy, umumy bilim elýeterliliginiň, startaplar üçin maliýe çeşmeleriniň we hünär-tehniki başarnyklaryň ösdürilmeginiň ähmiýetini bellediler.

• Otbek Şawkatow, «World Association Youth of Uzbekistan» guramasynyň başlygy, we Sabina Mal, BMG-niň Özbegistandaky hemişelik utgaşdyryjysy, ýaşlar syýasatynyň sebitleýin düzümlere integrasiýasynyň hem-de ýaşlaryň Durnukly ösüş maksatlaryny (SDG) amala aşyrmak işine işjeň gatnaşmagynyň möhümdigini nygtadylar.

• Rita Kolambiýa, BMG-niň Demirgazyk Makedoniýadaky hemişelik utgaşdyryjysy, ýaşlaryň karar kabul ediş proseslerine gatnaşmagynyň institusional taýdan berkidilmeginiň zerurdygyny belledi.

Herekete çagyryş

Bölümçä gatnaşyjylarynyň ählisi LLDC ýurtlaryny aşakdaky çäreleri durmuşa geçirmäge çagyrdylar:

• Ýaşlary ösüşde strategiki hyzmatdaş hökmünde ygtyýarly etmek.

• Okuw maksatnamalaryny zähmet bazarynyň talaplaryna laýyklykda täzelemek.

• Innowasiýalar we telekeçilik arkaly ykdysady ösüşi çaltlandyrmak üçin ýaşlary işjeňleşdirmek.

Bu başlangyçlar LLDC ýurtlarynyň ýaşlaryň diňe bir ses hukuklaryna eýe bolmagyna däl, eýsem öz geljegini kesgitlemekde esasy orny tutmagyna gönükdirilendir. Gatnaşyjylar bu dialogy geljekki halkara meýdançalarynda dowam etdirmäge taýyndyklaryny mälim etdiler.

ORIENT

Foto: education.gov.tm