Biz ýakynlaşmagy ugur edinýäris

Go Viral Festival 2023 – hut şul at bilen geçen iki günüň dowamynda türkmeniň paýtagtynda giň gerimli çäre geçirildi. Medeniýet, habar beriş serişdeleri, işewürlik we tehnologiýa ugurlaryny öz içine alýan bu festiwal özboluşly aragatnaşyk platformasy bolup, her ýyl Merkezi Aziýanyň ähli ýurtlarynda geçirilýär. Bu möwsümiň estafetaşy Daşkende başlandy we Oş, Duşanbe we Astana ýaly şäherlerden aýlanyp, şenbe güni Aşgabatda tamamlandy.

Türkmenistanda ikinji döredijilik we ideýa festiwalynyň açylyşy anna güni Arçabil myhmanhanasynda geçirildi. Taslamanyň Türkmenistandaky hormatly ilçisi Ýelena Gareýewa, Go Viral-yň utgaşdyryjysy Žanaýdar Duzgenbaý we ABŞ-nyň Türkmenistandaky ilçihanasynyň metbugat wekili Helen Şo açylyş dabarasynda çykyş etdiler.

— Go Viral – bu ABŞ-nyň Döwlet departamentiniň ABŞ-nyň Merkezi Aziýadaky diplomatik wekilhanalary tarapyndan goldanýan taslama. Aşgabat Özbegistanda, Gyrgyzystanda, Täjigistanda we Gazagystanda eýýäm bolup geçen birnäçe festiwallary tamamlaýar. Bu ýylyň nyşany sungat bolup, şonuň üçin bu ugurda festiwal milli äheňdäki türkmen senetçileriniň ussatlygyny görkezýän eserleriň sergisini hödürleýär. Mundan başga-da, ähli zallarda biri-birine dolanan eller görkezilen tagtalar bar we ol hem ýöne ýerden däl. Beýle gurnamalar şu ýyl her festiwalda bolupdy. Häzir sizde taslamanyň taryhynda yz galdyrmaga mümkinçiligiňiz bar – suart çekiň we arzuwlarymyzy ýazyň. Festiwalymyzdan soň her Merkezi Aziýa ýurtlaryndan şuňa meňzeş gurnamalar bitewiligi we özara baglanyşygy alamatlandyrýan ýeke uly polotno jemlener. Şeýle-de bolsa, Go Viral – diňe bir interaktiw tanyşdyryş we tolgundyryjy çekişme däl. Ol ilkinji nobatda, bu giň gerimli aragatnaşyk platformasy, şonuň üçin aragatnaşyk gurmak, tanyşmak we aragatnaşyk alyşmak üçin çekinmäň diýip, ilçi belledi.

Birinji sessiýada amerikan ýazyjysy Greg Bafford emeli intellektiň mümkinçilikleri we ony meseleleri çözmekde ulanylyşy barada çykyş etdi.

Mundan başga-da, ikinji günüň ahyryna çenli üç zalda - Baglanyşyk zalynda (Connection hall), Oýlap tapyş zalynda (Invention hall) we Ylham zalynda (Inspiration hall) panel sessiýalary geçirildi. Işewürlik, köpçülikleýin habar beriş serişdeleri, tehnologiýa, žurnalistika, kinematografiýa ugurlary boýunça hünärmenler tejribe alyşdylar, gyzykly wakalary ara alyp maslahatlaşdylar, adatdan daşary gyzyklanma görkezýän tomaşaçylaryň soraglaryna jogap berdiler.

— Her kim üçin Go Viral başgaça many berip biler, emma taslamanyň çuň manysyny şu ýylyy «Ylham ber we hyzmatdaşlyk et» («Inspire and Collaborate ») şygary görkezýär diýip hasaplaýarys. Taslamanyň Türkmenistanda bary-ýogy iki ýyl bäri işleýändigine garamazdan, bu format eýýäm köpleriň göwnüne ýaramagy başardy. Festiwala ýüzlerçe adam gatnaşdy we olaryň hersi bu çäreden lezzet alandyr diýip umyt edýäris, - diýip taslamanyň meýletinçisileri gürrüň berdi.

Sessiýalar tamamlanandan soň, myhmanlaryň hemmesi ýapylyş dabarasy üçin Connection-zalynda ýygnandylar. ABŞ-nyň Türkmenistandaky ilçisi Metýu Klimow çykyş etdi:

— Häzir şeýle köp tomaşaçylara seredenimde, özüm ruhlanýaryn. Ýüzüňizde görýän ýylgyryşlaryňyzdan we joşgunlaryňyzdan, bu iki günüň içinde geçen netijeli işlerden ylham alýaryn. Ussat sapaklary, seminarlary we diskussiýalary dogry birleşdirip, özara gatnaşyklaryňyzyň wagtyny «giňeltmegi» başardyk – siz söhbetdeş bolduňyz, pikir alyşdyňyz we täze baglanyşyk gurduňyz. Munyň özi hakykatdanam ylham beriji!

Ilçi myhmanlara ýüzlenenden soň, sosial ulgamlarda taslama tarapyndan geçirilen bäsleşigiň ýeňijilerine sowgat gowşurdy we soňra ähli gatnaşyjylary surat zolagyna çagyrdy.

Emma, bu entäk hemmesi däldi. Festiwala gelenlere ýene bir garaşylmadyk zat - aýdymçy Luweranyň konserti garaşýardy.

Iki gün dowam eden çekişmelerden, söhbetdeşlikden we «ylham beriji täsirlerden» soň myhmanlar öýli-öýüne dargaşyp başlady we olaryň hersi indiki festiwala çenli ýetjek oňyn energiýany hem ýany bilen alyp gitdi.

Saparguly MAHTUMOW

Foto: Go Viral tarapyndan berildi