Türkmen ýüzüjileri Tailandda Aziýanyň açyk çempionatynda 19 medal gazandylar
06.03.2023 | 16:50 |
Türkmen ýüzüjileri Bankokda (Tailandda) tamamlanan Aziýanyň açyk çempionatynda sportuň suw görnüşleri boýunça dürli gymmatlykdaky 19 medaly gazandylar.
Türkmenistanyň Sportyň suw görnüşleri boýunça federasiýasynda ORIENT-e habar berişlerine görä, ýaryşlaryň jemleýji gününde türkmen türgenleri 6 medal -bäş altyn we bir kümüş medal gazandylar.
Halkara derejeli sport ussady Merdan Ataýew 200 metr aralyga arkanlygyna ýüzmekde aralygy 2 minut 10 sekuntda geçip, altyn medal gazandy. Musa Jalaýew 50 metr aralyga erkin görnüşde ýüzmekde 24,08 sekunt görkezip, iň ýokary derejä ýetdi.
Türkmen ýygyndysyna ýene-de bir altyn medaly 50 metr aralyga ýüzmekde Anastasiýa Morgenştern getirdi (29.45 sekunt). Birinjiligiň kümüş baýragynyň eýesi Aýnur Primowa boldy, 200 metr aralyga arkanlaýyn ýüzmekde ikinji netijäni görkezdi (2 minut 32 sekunt).
Ýaryşylýan günüň iki altyn medalyny Dawid Akopýan aldy. Ilki türkmen ýüzüjisi erkin usulda 50 metr aralyga ýüzmekde Wýetnamdan we Tailanddan gelen bäsdeşlerini yzda galdyryp, ýeňiji boldy.
Onyň yzy bilen Akopýan 50 metr aralyga erkin ýüzmekde iň gowy netije görkezip, ýene-de bir altyn medal gazandy. Ol aralygy 25.52 sekuntda geçdi.
Şeýlelik bilen, ýaryşlaryň netijesi boýunça türkmen ýüzüjileri 19 medal gazandylar, olaryň 12-si altyn, 6-sy kümüş we 1-i bürünç medal.
3-5-nji martda Bankokda geçen Aziýanyň sportyň suw görnüşleri boýunça açyk çempionatynda Aziýanyň 12 ýurdundan iň gowy ýüzüjiler gatnaşdylar. Esasy ugurlardan başga ýaryşyň maksatnamasyna suwa bökmek we suw polosy girdi.
