Türkmen wekiliýeti Daşkentdäki “Türki dünýäsiniň zenanlarynyň älemi” atly halkara sergä gatnaşýarlar
22.04.2025 | 14:15 |
2025-nji ýylyň aprel aýynyň 21-25-i aralygynda Özbegistan Respublikasynyň Daşkent şäherinde “TÜRKSOÝ” halkara guramasy bilen bilelikde şekillendiriş we amaly-haşam sungatynyň Halkara festiwaly geçirilýär.
Festiwalyň çäklerinde “Türki dünýäsiniň zenanlarynyň älemi” atly halkara sergisi gurnalyp, oňa Türkmenistanyň Döwlet çeperçilik akademiýasynyň mugallymlary, Türkmenistanyň Suratkeşler birleşiginiň agzalary Hatyja Amansähedowa, Gunça Goçmyradowa hem-de Suratkeşler birleşiginiň başlygy Çarymyrat Ýazmyradow gatnaşýarlar. Zenan suratkeşler bu festiwalyň çäklerinde geçiriljek ylmy-amaly maslahata, döredijilik sergisine we beýleki çärelere hem gatnaşarlar.
Ýeri gelende belläp geçsek, ady agzalan sergide suratkeş Gunça Goçmyradowanyň “Bagt guşy”, “Türkmen halk ertekisi «Ýartygulak»”, “Türkmen halk ertekisi «Akpamyk»”, “Ene toprak” eserleri, şeýle-de Hatyja Amansähedowanyň “Kalbyň owazy”, “Bahar”, “Aýly gije”, “Baharyň owazy” atly nakgaşlyk eserleri görkezilýär.
ORIENT
