Biz ýakynlaşmagy ugur edinýäris

24-nji ýanwarda, anna güni geçirilen Türkmenistanyň Ministrler Kabinetiniň mejlisinde Türkmenistany 2025-nji ýylda durmuş-ykdysady taýdan ösdürmegiň we maýa goýum Maksatnamasynyň taslamasy hödürlendi.

Maksatnama önümçiligi diwersifikasiýalaşdyrmaga we innowasiýalary ornaşdyrmak arkaly ykdysady ösüş depginini ýokarlandyrmaga gönükdirilendir. Senagatyň ösmegine, täze iş orunlarynyň döredilmegine we ilatyň ýaşaýyş derejesini ýokarlandyrmaga aýratyn üns berler.

Esasy maksatlar şulary öz içine alýar: eksport ugurly we importyň ornuny tutýan ýokary hilli önümçilikleri ösdürmegiň hasabyna ykdysadyýetimiziň bäsdeşlige ukyplylygyny ýokarlandyrmak we netijede, daşary söwda dolanyşygyny artdyrmak; azyk howpsuzlygyny berkitmek we daşky gurşawy goramak; mundan beýläk-de döwrebap sanly tehnologiýalary, “ýaşyl” ykdysadyýeti ornaşdyrmak; kiçi we orta telekeçiligi ösdürmek arkaly amatly işewürlik gurşawyny döretmek. Maýa goýumlary çekmegiň we döwlet-hususy hyzmatdaşlygy berkitmäge gönükdirilen kanunçylyk binýadyny döwrebaplaşdyrmak babatda işler geçiriler.

2025-nji ýylda maýa goýumlary “Galkynyş” gaz känini özleşdirmegiň nobatdaky tapgyrlaryna, “Şatlyk-1” gaz gysyjy desgasyna, Türkmenistan — Owganystan — Pakistan — Hindistan gaz geçirijisiniň möhüm bölegine, Arkadagyň ak ýoly bilen Serhetabat — Hyrat gaz geçirijisiniň gurluşygyna, Balkan welaýatyndaky kuwwatlylygy 1574 megawat bolan utgaşykly dolanyşykda işleýän elektrik stansiýasyna, Jebel şäherçesindäki täze Halkara howa menziline, Aşgabat — Türkmenabat ýokary tizlikli awtomobil ýoluna, Garabogazköl aýlagynyň üstünden geçýän köprüni durmuşa geçirmäge gönükdiriler. Sebitde iri taslamalaryň biri bolan Arkadag şäheriniň ikinji tapgyrynyň gurluşygyna aýratyn üns berler.

ORIENT

Foto: orient.tm