22-nji iýunda, ýekşenbe güni, amerikan tarapynyň başlangyjy boýunça Türkmenistanyň daşary işler ministri Raşid Meredow ABŞ-nyň Döwlet sekretarynyň birinji orunbasary Kristofer Landau bilen telefon arkaly söhbetdeşlik geçirdi. Söhbetdeşligiň dowamynda taraplar Türkmenistanyň we Amerikanyň Birleşen Ştatlarynyň arasyndaky syýasy, söwda-ykdysady, ynsanperwer we medeni we beýleki ugurlarda hyzmatdaşlygyň köp ýyllyk oňyn tejribesini bellediler.
Iki döwletiň daşary syýasat edaralarynyň ýolbaşçylary halkara we sebit derejesinde gyzyklanma bildirilýän meseleleri ara alyp maslahatlaşdylar. Hususan-da, Ýakyn Gündogar sebitindäki ýüze çykan häzirki ýagdaýlar we şonuň bilen baglylykda, birnäçe ynsanperwer meseleleriň çözülmegi barada pikir alyşdylar.
Şol bir wagtyň özünde, BMG-niň üsti bilen halkara jemgyýetçiligi tarapyndan üç gezek ykrar edilen bitarap döwlet bolmak bilen, Türkmenistan halkara işlerinde işjeň we konstruktiw orny eýeleýändigi aýratyn nygtaldy. Şunuň bilen baglylykda, türkmen tarapy islendik halkara meselelerini parahatçylykly ýol bilen çözmek ýörelgelerine berk eýerip hem-de diplomatik serişdeleriň we usullaryň iň giň mümkinçiliklerini ulanyp, Ýakyn Gündogarda ýüze çykan häzirki ýagdaýy çözmäge gatnaşmaga taýýardygyny mälim etdi diýip, Türkmenistanyň DIM-niň habarynda aýdylýar.
ORIENT
