Biz ýakynlaşmagy ugur edinýäris

23-nji sentýabrda Türkmenistanyň Pakistandaky ilçihanasy Islamabat şäherindäki Bahriýa Uniwersitetiniň kampusynda möhüm umumy sapagyny geçirdi. Türkmenistanyň ilçisi A. Möwlamow we Ilçihananyň 1-nji sekretary B. Ýazow uniwersitete baryp, hyzmatdaşlyk mümkinçiliklerini ara alyp maslahatlaşdylar we talyplara ýurdumyzyň daşary syýasatynyň esasy ugurlaryny tanyşdyrdylar.

Ilçihananyň wekilleri kampusyň baş direktory Naim Sarwar we ynsanperwer we jemgyýeti öwreniş ylymlary fakultetiniň dekany, professor Adam Saud bilen duşuşdylar. Taraplar bilim we ylmy ugurlarda, akademik alyş-çalyş we bilelikdäki ylmy taslamalar boýunça hyzmatdaşlygy ara alyp maslahatlaşdylar.

Duşuşykdan soň Ilçihananyň 1-nji sekretary «Parahatçylygy we ynanyşmagy berkitmekde Türkmenistanyň oňyn bitaraplygynyň ähmiýeti» atly temada umumy sapagyny geçirdi. Ol ýurdumyzyň bitaraplyk derejesiniň parahatçylyk we ynanyşmak üçin ähmiýetini giňişleýin düşündirdi, Türkmenistanyň Prezidentiniň Global howpsuzlyk strategiýasy bilen tanyşdyrdy we TOPH hem-de TOP ýaly möhüm energetika taslamalary barada maglumat berdi. Şeýle hem 2025-nji ýylyň Halkara parahatçylyk we ynanyşmak ýyly hökmünde we 12-nji dekabrda geçiriljek Halkara parahatçylyk we ynanyşmak forumynyň ähmiýeti bellenildi.

Umumy sapagyň ahyrynda talyplar gyzyklanma bildirip, Türkmenistanyň we Pakistanyň arasyndaky ikitaraplaýyn gatnaşyklarynyň ösmegi, sebitde üstaşyr-ulag mümkinçilikleriniň ulanylmagy we energetika taslamalarynyň durmuşa geçirilmeginiň mümkinçilikleri baradaky soraglary berdiler.

Ilçi A. Möwlamow we işdeşleri jikme-jik jogap berdiler, durnukly ösüşiň ynanyşmagyň we hyzmatdaşlygyň esasynda amala aşyrylýandygyny nygtadylar. Hususan-da, sebitiň energetika taslamalarynyň strategik ähmiýetiniň we ýaş hünärmenler nesliniň geljekde döwletara gatnaşyklar üçin möhüm ornunyň bardygy bellenildi.

ORIENT

Foto: bilim.tm