Hormatly Prezidentimiz Serdar Berdimuhamedow Türkmenistanyň halkynyň we Hökümetiniň adyndan hem-de hut öz adyndan Iki Mukaddesligiň Hyzmatkäri Saud Arabystanynyň Patyşasy Salman ben Abdelaziz Al Sauda hem-de Saud Arabystany Patyşalygynyň Mirasdüşer Şazadasy, Ministrler Kabinetiniň Başlygy Mohammed bin Salman bin Abdelaziz Al Sauda we ýurduň ähli doganlyk halkyna Saud Arabystany Patyşalygynyň Milli güni mynasybetli tüýs ýürekden gutlaglaryny, iň gowy arzuwlaryny iberdi.

Döwlet Baştutanymyz ýurdumyzyň Saud Arabystany bilen däp bolan dost- doganlyk gatnaşyklaryna ygrarlydygyny belläp, Türkmenistanda Saud Arabystany Patyşalygy bilen ikitaraplaýyn hyzmatdaşlygyň derejesine ýokary baha berilýändigini nygtady. Hormatly Prezidentimiz iki ýurduň doganlyk halklarynyň abadançylygynyň, rowaçlygynyň bähbidine döwletara dialogyň bar bolan mümkinçilikleriniň doly herekete getiriljekdigine berk ynam bildirdi.

Döwlet Baştutanymyz mümkinçilikden peýdalanyp, Patyşa Salman ben Abdelaziz Al Sauda hem-de Mirasdüşer Şazada, Ministrler Kabinetiniň Başlygy Mohammed bin Salman bin Abdelaziz Al Sauda tüýs ýürekden berk jan saglyk, bagtyýarlyk, Saud Arabystany Patyşalygynyň halkyna bolsa parahatçylyk, abadançylyk, mundan beýläk-de ösüş we rowaçlyk arzuw etdi. “Goý, Gudraty Güýçli Allatagala Size ýurduňyzyň we külli musulman ymmatynyň bähbidine gönükdirilen ähli asylly başlangyçlaryňyzda medet bersin!” - diýip, hormatly Prezidentimiz arzuwlaryny beýan etdi.

Saud Arabystanynyň Milli güni her ýyl 23-nji sentýabrda bellenilip geçilýär. Bu sene 1932-nji ýylda Patyşa Abdel-Aziz Al Saud tarapyndan Patyşalygyň birleşdirilmeginiň hatyrasyna bellenilýär. Bu gün döwlet baýramçylygy bolup, ýurduň häzirki döwrüniň taryhynyň başlangyjyny alamatlandyrýar.

ORIENT