Biz ýakynlaşmagy ugur edinýäris

14-nji sentýabrda Balkanabatda «Kitaplar – üstünligiň açary» atly kitapsöýüjileriň bäsleşigi geçirildi. «Kämil bilim» okuw merkezi tarapyndan guralan bu çäre ýurdumyzyň günbatar sebitinden takmynan 300 kitapsöýüjini jemledi. Bäsleşigiň maksady ýaş nesliň bilim derejesini ýokarlandyrmak, ýady kämilleşdirmek we kitap okamaklyga höwes döretmekden ybarat boldy.

Bäsleşige gatnaşanlar türkmen ýazyjylary Rahmet Gylyjowyň («Halallyk kyssalary») hem-de Kömek Kulyýewiň («Ömür kerweni») eserleri boýunça synag tabşyryklaryny ýerine ýetirdiler. Bäsleşigiň şertleri öňünden okuw merkeziniň sosial ulgamlarynda ýerleşdirildi.

Netijeler boýunça baýrakly orunlara mynasyp bolanlar:

1-nji ýer: Hatyja Nurberdiýewa – Balkanabat şäheriniň ýöriteleşdirilen 22-nji orta mekdebiniň türkmen dili we edebiýaty mugallymy.

2-nji ýer: Aziza Gulamowa – şol mekdebiň okuwçysy.

3-nji ýer: Nurjemal Nyýazmyradowa – Esenguly etrabynyň 8-nji orta mekdebiniň okuwçysy.

Ýeňijilere ýadygärlik sowgatlary gowşuryldy we okuw merkezinde bilim almak boýunça ýeňillikler berildi. Bäsleşigiň guramaçylary Balkan welaýatynyň Baş bilim müdirligi hem-de «Kämil bilim» okuw merkeziniň Balkanabat şäherindäki şahamçasydyr.

Sylaglamak dabarasynda, aýratyn-da ýaşlar üçin, şahsyýetiň ähli taraplaýyn ösüşinde kitap okamagyň möhüm ähmiýeti nygtaldy. Şeýle hem Gahryman Arkadagymyzyň «Ömrümiň manysynyň dowamaty» atly kitabynda hem adamyň ruhy dünýäsini baýlaşdyrmakda, medeni we akyl-paýhas taýdan ösüşinde kitap okamagyň möhüm ähmiýetiniň giňden açylyp görkezilendigi bellenildi.

ORIENT

Foto: bilim.tm