Biz ýakynlaşmagy ugur edinýäris

Osakada geçirilýän «Ekspo-2025» Bütindünýä sergisinde Türkmenistanyň pawilýony ýene-de üns merkezinde boldy.

Onuň hormatly myhmanlarynyň biri meşhur ýapon aktrisasy, model, jemgyýetçilik işgäri we Ýapon pawilýonynyň direktory Norika Fudziwara boldy.

Onuň bu sapary çärä aýratyn öwüşgin berdi hem-de Türkmenistana, onuň medeniýetine we häzirki zaman üstünliklerine bolan gyzyklanmany açyp görkezdi.

Hormatly myhmanlaryň arasynda Ýaponiýanyň döwlet edaralarynyň wekilleri, halkara guramalaryň we diplomatik missiýalaryň ýolbaşçylary hem bardy.

Pawilýona Osaka prefekturasynyň wise-gubernatorlary Sigeki Watanabe we Nobuhiko Ýamaguti, Ýaponiýanyň Içeri işler we aragatnaşyklar ministrliginiň baş direktory Kuniaki Hara, Fransiýanyň baş komissary Žak Mer, «Ekspo» Assosiasiýasynyň baş sekretarynyň orunbasary Manatsu Itinoki, Sukuba uniwersitetiniň rektory Kýosuke Nagata, ABŞ pawilýonynyň direktory Rami Şakra, Gazagystanyň söwda we integrasiýa ministri Arman Şakraliew, şeýle-de Ýaponiýanyň ykdysadyýet, söwda we senagat ministrliginiň parlament boýunça wise-ministri, Geňeşçiler palatasynyň agzasy Akiýosi Kato bardy.

Myhmanlara ýurduň baý medeni mirasy, el işleri, binagärlik däpleri hem-de dürli ugurlardaky häzirki zaman taslamalary bilen tanyşmak mümkinçilikleri hödürlendi. Mähirli garşylama we inçelik bilen taýýarlanan türkmen tagamlary pawilýondaky ýagdaýy has-da ýatda galyjy etdi.

Hormatly myhmanlaryň pawilýona baryp görmekleri ýene bir gezek Türkmenistana halkara derejesinde uly gyzyklanmanyň bardygyny, ýurduň öz medeniýetini, däplerini we innowasiýalaryny dünýä giňişliginde üstünlikli tanadýandygyny görkezdi.

ORIENT

Foto: orient.tm