Türkmenistanyň Prezidenti Serdar Berdimuhammedow anna güni, oktýabryň 17-sine, Aşgabat şäherine wekiliýetiň başynda gelen Gazagystan Respublikasynyň Premýer-ministriniň orunbasary – Hökümet Diwanynyň ýolbaşçysy Galymžan Koýşybaýewi kabul etdi.

Duşuşygyň dowamynda ýokary derejedäki yzygiderli gatnaşyklaryň döwletara hyzmatdaşlygynyň toplumlaýyn ösüşini kesgitleýän möhüm faktor bolup durýandygy nygtaldy. Gün tertibinde söwda-ykdysady hyzmatdaşlygy aýratyn orun eýeledi.

Hyzmatdaşlygyň anyk ileri tutulýan ugurlary kesgitlenildi. Şolaryň hatarynda ulag-logistika ulgamynda özara gatnaşyklaryň pugtalandyrylmagy, hususan-da “Demirgazyk-Günorta” ugruny öz içine alýan halkara geçelgeleriniň ösdürilmegi aýratyn üns merkezinde boldy. Şeýle hem sanlylaşdyrma ulgamyndaky hyzmatdaşlygyň giňeldilmegine, infrastrukturanyň we innowasiýalaryň kämilleşdirilmegine, şeýle-de “ýaşyl” ykdysadyýet hem-de daşky gurşawy goramak meselelerine aýratyn ähmiýet berilýändigi bellenildi. Bu barada Türkmenistanyň Döwlet teleradio ýaýlymynyň habarlar gepleşiginde habar berildi.

Şol günüň özünde Aşgabatda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow bilen Galymžan Koýşybaýewiň arasynda hem duşuşyk geçirildi.

Diplomatlar şu ýyl geçirilmegi meýilleşdirilýän çäreleriň, şol sanda Ykdysady, ylmy-tehniki we medeni hyzmatdaşlyk boýunça türkmen-gazagystan hökümetara toparynyň nobatdaky mejlisine taýýarlyk meselelerini ara alyp maslahatlaşdylar. Gepleşikleriň dowamynda iki ýurduň sebit we halkara derejelerinde alnyp barylýan hyzmatdaşlygyna ýokary baha berildi.

ORIENT