Türkmenistanda bugdaý ekişine 3-nji sentýabrda girişiler Orient

Türkmenistanda bugdaý ekişine 3-nji sentýabrda girişiler

30.08.2025 | 01:05 |

Ministrler Kabinetiniň Başlygynyň orunbasary Taňryguly Atahallyýew gözegçilik edýän toplumynda 2025-nji ýylyň sekiz aýynda ýerine ýetirilen işleriň netijeleri, şeýle hem oba hojalyk işleriniň geçirilişi barada hasabat berdi. Prezident Serdar Berdimuhamedow hasabaty diňläp, ýurduň welaýatlarynda 3-nji sentýabrda bugdaý ekişine girişmäge ak pata berdi,

Döwlet Baştutany Ministrler Kabinetiniň agzalaryna ýüzlenip, gallaçy daýhanlarymyz üçin möhüm we jogapkärli möwsüm bolan bugdaý ekişiniň ýetip gelendigini, ekişi agrotehniki möhletlerde guramaçylykly geçirmegiň wajypdygyny belledi. Şunuň bilen baglylykda, öňden gelýän däp-dessurlara görä hormatly ýaşulular bugdaý ekişine “bismilla” bilen başlap bererler.

Sekiz aýyň jemleri

Oba hojalyk pudagy boýunça önümçiligiň ösüş depgini, geçen ýylyň degişli döwri bilen deňeşdirilende, 110,4%-e barabar boldy. Şeýle görkezijiler aşakdaky pudaklarda hasaba alyndy:

• Suw hojalygy baradaky döwlet komiteti: +33,4%

• “Türkmenpagta” döwlet konserni: +19,5%

• Azyk senagaty döwlet birleşigi: +7,8%

• “Türkmengallaönümleri” döwlet birleşigi: +3,8%

• “Türkmen atlary” döwlet birleşigi: +2,5%

• Oba hojalyk ministrligi: +2,4%

• “Türkmenobahyzmat” döwlet birleşigi: +1,1%

• Daşky gurşawy goramak ministrligi: +0,9%

• Maldarçylyk we guşçulyk senagaty döwlet birleşigi: +0,8%

Şeýle hem maýa goýum serişdelerini özleşdirmegiň meýilnamasy 245,3% ýerine ýetirilendigi habar berildi.

Wise-premýer pagta hasylyny öz wagtynda ýygnap almak, şol sanda pagta arassalaýjy kärhanalaryň, pagta kabul ediş harmanhanalaryň, pagta daşamakda ulanyljak tehnikalaryň taýýarlyk işleri barada hasabat berdi. Şeýle hem geljek ýylyň bugdaý hasylynyň düýbüni tutmak boýunça ekiş möwsümine taýýarlyk işleri alnyp barylýar.

Prezident hasabaty diňläp, wise-premýere oba hojalyk pudagyny toplumlaýyn ösdürmek boýunça netijeli işleri geçirmegi dowam etdirmegi tabşyrdy. Döwlet Baştutany zähmetsöýer gallaçylaryna, ähli oba hojalyk işgärlerine alyp barýan işlerinde uly üstünlikleri arzuw etdi.

ORIENT