Türkmenistan: Eýrandan gelýänlere üstaşyr geçmek üçin ynsanperwerlik geçelgesini üznüksiz üpjün edýär
19.06.2025 | 03:40 |
Türkmenistanyň Daşary işler ministrligi Eýrandan gelip, öz ýurtlaryna gidýän daşary ýurt raýatlary üçin gije-gündizleýin ynsanperwerlik geçelgesini üpjün etmegini dowam etdirýändigini mälim edýär. Bu üznüksiz iş, Türkmenistanyň raýdaşlyk we hoşniýetli goňşuçylyk ýörelgelerine ygrarlydygyny görkezýär.
Häzirki wagtdaky ýagdaýa görä, Hindistanyň, Hytaýyň, Pakistanyň we beýleki ýurtlaryň raýatlary bolan ýüzlerçe adam barlag-goýberiş nokatlary arkaly Türkmenistanyň döwlet serhedinden geçdi. Türkmen häkimiýeti bu raýatlaryň päsgelçiliksiz üstaşyr geçmegi üçin ähli zerur çäreleri görýärler, watanyna howpsuz we rahat dolanmagyny üpjün edýärler.
Bu uly göwrümli ynsanperwerlik işi, Aşgabatda akkreditlenen daşary ýurtlaryň diplomatik wekilhanalary bilen ýakyndan we netijeli hyzmatdaşlykda amala aşyrylýar.
Bu yzygiderli hereketler, oňyn Bitaraplyk ýörelgelerine esaslanýan Türkmenistanyň daşary syýasatynyň durmuşa geçirilişiniň, şeýle hem halkara jemgyýetçiligine möhüm ynsanperwerlik meselelerini çözmekde işjeň ýardam bermäge taýýardygyny görkezýär.
Ozal biz Türkmenistanyň hem Bahreýniň raýatlaryny Eýrandan ewakuasiýa etmek üçin ýardam bermäge taýýardygyny habar berdik .
ORIENT
