16-njy iýunda, Aşgabatda Türkmenistanyň Daşary işler ministri Raşid Meredow Sloweniýa Respublikasynyň Daşary we Ýewropa işleri ministrliginiň Döwlet sekretary Marko Ştusin bilen duşuşdy.
Gepleşikler iki ýurduň arasyndaky dialogy ösdürmekde möhüm ädim boldy. Hyzmatdaşlygyň ikitaraplaýyn we köptaraplaýyn görnüşleri, şol sanda halkara guramalaryň meýdançalarynda, ilkinji nobatda BMG-niň çägindäki özara gatnaşyklar ara alnyp maslahatlaşyldy.
Soňra Türkmenistanyň we Sloweniýanyň daşary syýasat edaralarynyň arasynda syýasy geňeşmeler geçirildi. Türkmen tarapyna Türkmenistanyň Daşary işler ministriniň orunbasary Mähri Bäşimowa, slowen wekiliýetine – Döwlet sekretary Marko Ştusin ýolbaşçylyk etdi.
Üns merkezinde – türkmen-slowen hyzmatdaşlygyny çuňlaşdyrmak, sebit gün tertibindäki häzirki meseleler we hyzmatdaşlygyň hukuk binýadyny giňeltmek boldy. Taraplar döwletara gatnaşyklary işjeňleşdirmek baradaky özara gyzyklanmalaryny tassykladylar.
Taraplar söwda-ykdysady ugurdaky hyzmatdaşlyga hem aýratyn üns berdiler. Telekommunikasiýa, ulag, derman senagaty, innowasion tehnologiýalar, söwda ýaly ugurlarda amaly hyzmatdaşlygyň hakyky mümkinçilikleriniň bardygy bellendi. Şunuň bilen baglylykda Söwda-ykdysady hyzmatdaşlyk boýunça hökümetara toparynyň ähmiýeti nygtaldy.
Şeýle hem özara düşünişmegi güýçlendirmek we iki ýurduň halklaryny ýakynlaşdyrmak maksady bilen medeniýet we bilim ýaly ynsanperwer gatnaşyklary ösdürmek meýilnamalary ara alnyp maslahatlaşyldy.
ORIENT
