Türkmenistan we Gruziýa daşary işler ministrleriniň duşuşygynda ikitaraplaýyn gatnaşyklary berkidýärler
22.10.2025 | 10:55 |
Oktýabr aýynyň 21-ne Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow Gruziýa resmi saparynyň çäginde Gruziýanyň daşary işler ministri Maka Boçorişwili bilen gepleşikleri geçirdi.
Duşuşykda taraplar syýasy, ykdysady we ynsanperwer ugurlarda ikitaraplaýyn gatnaşyklary ösdürmegiň meseleleri boýunça giň gerimli pikir alyşdylar. BMG-niň hem-de beýleki halkara guramalarynyň çäginde hyzmatdaşlygy ösdürmegiň ähmiýeti aýratyn bellenip geçildi.
Ministrler iki ýurduň daşary syýasat edaralarynyň arasynda yzygiderli geňeşmeleriň geçirlmeginiň we ýokary derejeli saparlaryň möhümdigini nygtadylar. Gepleşikleriň dowamynda söwda-ykdysady hyzmatdaşlygy giňeltmegiň mümkinçilikleri hem ara alnyp maslahatlaşyldy. Hususan-da, taraplar ulag, söwda, bilim, ylym, sport we syýahatçylyk ugurlarynda hyzmatdaşlygyň ileri tutulýan ugurlaryny bellediler.
Medeni-ynsanperwer gatnaşyklary ösdürmek aýratyn ugur hökmünde ara alnyp maslahatlaşyldy. Ministrler Türkmenistanyň we Gruziýanyň halklarynyň arasyndaky dostlugy berkitmäge gönükdirilen özara medeni çäreleri geçirmäge gyzyklanma bildirdiler.
Resmi saparyň çäginde Gruziýanyň Parlamentinde hem Türkmenistanyň daşary işler ministri Raşid Meredow bilen Parlamentiň Başlygy Şalwa Papuaşwili duşuşyk geçirdiler. Taraplar iki ýurduň arasyndaky dostlukly gatnaşyklary pugtalandyrmagyň hem-de umumy bähbitlere laýyk gelýän netijeli hyzmatdaşlygy giňeltmegiň möhüm guraly hökmünde parlamentara gatnaşyklary ösdürmegiň mümkinçiliklerini ara alyp maslahatlaşdylar.
Daşary işler ministri Raşid Meredow daşary syýasatda parlament diplomatiýasynyň aýratyn ornuny belläp, parlamentara hyzmatdaşlygyň ikitaraplaýyn gatnaşyklary mundan beýläk-de ösüşiň täze derejesine çykarmakda möhüm ähmiýete eýedigini nygtady. Ol Türkmenistanyň we Gruziýanyň syýasy gatnaşyklarynyň ýokary depginde ösdürilýändigini hem-de täze hil derejesine çykandygyny belledi.
Taraplar deňhukuklylyk we özara hormat goýmak ýörelgelerine esaslanyp, iki ýurduň halklarynyň bähbidine strategik hyzmatdaşlygy we özara gatnaşygyň ähli ugurlaryny mundan beýläk-de pugtalandyrmaga taýýardyklaryny tassykladylar.
