Türkmenistanyň DIM-niň ýolbaşçysy Gruziýanyň Prezidenti bilen ikitaraplaýyn gatnaşyklary ara alyp maslahatlaşdy
22.10.2025 | 11:15 |
21-nji oktýabrda Gruziýa amala aşyrýan resmi saparynyň çäginde Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow Gruziýanyň Prezidenti Mihail Kawelaşwili bilen duşuşyk geçirdi.
Duşuşygyň dowamynda Türkmenistan bilen Gruziýanyň arasyndaky ikitaraplaýyn hyzmatdaşlygyň möhüm meseleleri, syýasy dialogy berkitmek, şeýle hem ykdysady we medeni gatnaşyklary ösdürmek meseleleri ara alnyp maslahatlaşyldy. Taraplar iň ýokary we ýokary derejedäki yzygiderli gatnaşyklaryň strategik hyzmatdaşlygyň has-da pugtalandyrylmagyna hyzmat edýändigini bellediler.
Gruziýanyň Prezidentine Türkmenistanyň Prezidenti Serdar Berdimuhamedowdan hem-de türkmen halkynyň Milli Lideri, Halk Maslahatynyň Başlygy Gurbanguly Berdimuhamedowdan mähirli salamlar we iň gowy arzuwlar ýetirildi.
Taraplar Türkmenistanyň we Gruziýanyň BMG-niň çäginde biri-biriniň başlangyçlaryny yzygiderli goldaýandyklaryny hem-de halkara derejede bilelikdäki başlangyçlaryň awtory bolup çykyş edýändiklerini bellediler. Gruziýanyň Prezidenti Türkmenistanyň hemişelik bitaraplyk syýasatynyň umumy parahatçylygy üpjün etmäge möhüm goşant goşýandygyny we bu ugurda halkara jemgyýetçiliginiň giň goldawyna eýedigini nygtady.
Şol günüň dowamynda Raşid Meredow Gruziýanyň Premýer-ministri Irakliý Kobahidze bilen hem duşuşdy. Gepleşikleriň dowamynda taraplar Türkmenistan bilen Gruziýanyň arasyndaky syýasy-diplomatik, söwda-ykdysady hem-de medeni-ynsanperwer ugurlarda ikitaraplaýyn hyzmatdaşlygyň giň gerimini ara alyp maslahatlaşdylar. BMG-niň çägindäki köptaraplaýyn hyzmatdaşlygyň üstünlikli derejesi aýratyn nygtaldy.
Gruziýanyň Premýer-ministri şu ýylda Türkmenistana amala aşyran saparlarynyň hem-de Prezident Serdar Berdimuhamedow bilen bolan duşuşyklarynyň netijeliligini belläp, olaryň ikitaraplaýyn gatnaşyklary berkitmekde möhüm ähmiýete eýedigini aýtdy.
