Biz ýakynlaşmagy ugur edinýäris

Aşgabat, 25-nji iýul | ORIENT. Şu gün Prezident Serdar Berdimuhamedow Hytaý Halk Respublikasynyň Türkmenistanda täze bellenen Adatdan daşary we Doly ygtyýarly ilçisi Szi Şumini kabul etdi. Diplomat döwlet Baştutanyna ynanç hatyny gowşurdy. Bu bolsa onuň ýurtdaky missiýasynyň resmi taýdan başlandygyny alamatlandyrýar.

Strategiki hyzmatdaşlyk we özara hormat

Duşuşmaga döredilen mümkinçilik üçin hoşallyk bildirip, Ilçi Szi Şumin Hytaýyň giň möçberli özgertmeler ýoly bilen ynamly öňe barýan Türkmenistan bilen strategik hyzmatdaşlygyň ösdürilmegine möhüm ähmiýet berilýändigini belledi. Ilçi HHR-iň Başlygy Si Szinpiniň Prezident Serdar Berdimuhamedowa hem-de türkmen halkynyň Milli Liderine iberen mähirli salamyny, iň gowy arzuwlaryny ýetirdi. Şeýle-de diplomat, halkara jemgyýetçiliginiň yzygiderli giň goldawyna eýe bolan Türkmenistanyň möhüm halkara başlangyçlaryna Hytaýyň ýokary baha berýändigini nygtady.

Prezident Serdar Berdimuhamedow, Szi Şumine bu jogapkärli wezipede alyp barjak işiniň dowamynda iki ýurduň arasyndaky hemmetaraplaýyn gatnaşyklary mundan beýläk-de üstünlikli ösdürmäge ýardam etjekdigine ynam bildirdi. Türkmen döwletiniň Baştutany, Başlyk Si Szinpine iň gowy arzuwlaryny beýan edip, Hytaý Halk Respublikasynyň Türkmenistan üçin iň möhüm strategik hyzmatdaşlaryň biridigini nygtady.

Gaz geçirijiden “Ýüpek ýoluna” çenli: Ykdysadyýet we medeniýet dostlugyň sütüni hökmünde

Prezident Serdar Berdimuhamedow Türkmenistanyň ähli derejede syýasy dialogyň has-da giňeldilmegine aýratyn ähmiýet berýändigini aýratyn belledi. “Biziň ýurtlarymyzy köpasyrlyk dostluk gatnaşyklary baglanyşdyrýar, häzirki wagtda alnyp barylýan hyzmatdaşlyk bolsa deňhukuklylyk, birek-birege hormat goýmak, özara ynanyşmak ýörelgelerine esaslanýar” diýip, Türkmenistanyň Prezidenti aýtdy hem-de soňky ýyllarda Türkmenistan bilen Hytaýyň arasyndaky syýasy dialogyň hil taýdan täze derejä çykarylandygyny kanagatlanma bilen belledi. Munuň şeýledigine özara saparlar we geňeşmeler hem aýdyň şaýatlyk edýär.

Şunuň bilen baglylykda, Prezident Serdar BerdimuhamedowyňAstanada geçirilen ikinji “Merkezi Aziýa — Hytaý” sammitiniň meýdançasynda HHR-iň Başlygy Si Szinpin bilen geçiren duşuşygynyň ähmiýeti bellenildi. Duşuşygyň barşynda iki ýurduň hem hyzmatdaşlygy çuňlaşdyrmaga ygrarlydygy tassyklanyldy.

Ykdysady ulgam ikitaraplaýyn gatnaşyklaryň ileri tutulýan ugurlarynyň biri bolmagynda galýar. Uzak ýyllaryň dowamynda Hytaý Türkmenistanyň esasy söwda-ykdysady we maýa goýum hyzmatdaşy bolup durýar. Uly göwrümli Türkmenistan — Özbegistan — Gazagystan — Hytaý gaz geçirijisi ýangyç-energetika pudagyndaky netijeli we özara bähbitli hyzmatdaşlygyň aýdyň mysaly hökmünde bellenildi. Şeýle hem Türkmenistan “Beýik Ýüpek ýoluny gaýtadan dikeltmek” strategiýasynyň we Hytaýyň “Bir guşak, bir ýol” başlangyjynyň mundan beýläk-de utgaşdyrylmagyny goldaýar.

Medeni-ynsanperwer ulgam döwletara hyzmatdaşlygyň aýrylmaz bölegi bolup durýar. Taraplar ylym, bilim, saglygy goraýyş we medeniýet pudaklaryndaky gatnaşyklary çuňlaşdyrmaga aýratyn üns berdiler, bilim ulgamyndaky hyzmatdaşlyk maksatnamalarynyň çäklerindäki başlangyçlaryň iki ýurduň halklarynyň arasyndaky ynanyşmagy we özara düşünişmegi pugtalandyrmaga itergi berjekdigine ynam bildirdiler.

Foto: orient.tm