Aşgabatda "Güneşli" çagalar we ýetginjekler merkezi hem-de teleskoply obserwatoriýa gurlar
30.05.2025 | 10:40 |
Milli bilim ulgamyny ösdürmek hem-de onuñ maddy-tehniki binýadyny berkitmek maksady bilen, Türkmenistanyñ Prezidenti paýtagtymyzda döwrebap bilim desgalaryny gurmaga gönükdirilen Karara gol çekdi.
Resminama laýyklykda Türkmenistanyñ Bilim ministrligine Aşgabat şäherinde "Güneşli" çagalar we ýetginjekler merkezini taslamak we gurmak barada şertnama baglaşmaga rugsat berildi. Täze bina halkara standartlaryna laýyk gelýän öñdebaryjy enjamlar bilen enjamlaşdyrylyp, ýaş ösüp gelýän nesliñ döredijilik we ylmy taýdan ösmegi üçin ýene bir häzirki zaman platforma öwrüler. Şeýle hem, täze binanyñ ýerleşdiriljek çäginiñ daş-töweregi abadanlaşdyrylar.
Mundan başga-da, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň pul serişdeleriniñ hasabyna "Güneşli" merkeziniñ çäginde älem giñişligine gözegcilik etmek üçin teleskoply obserwatoriýa hem dörediler. Ol Bazar Amanow adyndaky Döwlet çagalar kitaphanasynyñ düzümine girer. Bu kitaphana hem häzirki zaman sanly tehnologiýalar bilen enjamlaşdyrylar.
Gurluşyk işleriniñ başlanmagy 2025-nji ýylyñ iýun aýyna meýilleşdirildi. Gurluşygyñ tamamlanmagy hem-de gutarnykly görnüşde ulanmaga berilmegi 2027-nji ýylyñ maý aýyna göz öñünde tutuldy.
Täze infrastruktura ýaş ösüp gelýän nesliñ intellektual, ylmy we medeni ösüşinde möhüm ädim bolar.
ORIENT
