Biz ýakynlaşmagy ugur edinýäris

Türkmenistanyň Prezidentiniň ýanyndaky Döwlet gullugy akademiýasynyň diňleýjilerinden we mugallymlaryndan ybarat wekiliýet Türkiýe Respublikasynyň Prezidentiniň Işgärleri dolandyrmak edarasynyň çakylygy boýunça Ankara iş saparyny amala aşyrýar. Sapar Türkmenistanyň Prezidentiniň ýanyndaky Döwlet gullugy akademiýasynyň we Türkiýe Respublikasynyň Prezidentiniň Işgärleri dolandyrmak edarasynyň arasynda Adam serişdesini dolandyrmak babatda hyzmatdaşlygy ösdürmek boýunça özara düşünişmek hakynda Ähtnamanyň çäklerinde guraldy. Bu Ähtnama 2023-nji ýylda Prezident Serdar Berdimuhamedowyň Türkiýe Respublikasyna amala aşyran resmi saparynyň çäklerinde Ankarada gol çekildi.

Iş saparynyň ilkinji günlerinde Türki Döwletleriň Guramasynyň çäklerindäki Türki dünýäsiniň adam serişdesini ösdürmek institutynyň (TIKGE) ilkinji maslahaty hem geçirildi. Duşuşyk Türkiýäniň Milli prezident kitaphanasynda geçirilip, oňa Türkmenistanyň, Gyrgyzystanyň we Özbegistanyň döwlet gullugy we döwlet dolandyryş akademiýalarynyň wekilleri gatnaşdy.

Saparyň dowamynda türkmen gatnaşyjylary adam serişdelerini dolandyrmak, howanyň üýtgemegi bilen baglanyşykly meseleler, Türkiýe Respublikasynyň medeni, ykdysady mümkinçilikleri ýaly mowzuklar boýunça birnäçe umumy sapaklara gatnaşarlar.

Myhmanlar üçin Stambulyň ýadygärliklerine baryp görmek çäresini öz içine alýan medeni maksatnama hem göz öňünde tutuldy.

ORIENT news

Foto: Türkmenistanyň Prezidentiniň ýanyndaky Döwlet gullugy akademiýasy tarapyndan berildi