Biz ýakynlaşmagy ugur edinýäris

Türkmenistanyň Bilim ministrliginde Astanada tamamlanan Matematika, fizika we informatika boýunça XXI Halkara Žautykow olimpiadasynyň ýeňijilerini sylaglamak dabarasy geçirildi. Türkmenistanyň Prezidentiniň adyndan olara gymmat bahaly sowgatlar gowşuryldy.

Türkmen mekdep okuwçylary 2 altyn, 4 kümüş we 6 bürünç medala mynasyp boldylar. Türkmenistanyň adyndan olimpiada 21 sany mekdep okuwçy gatnaşdy.

Umumylykda Matematika, fizika we informatika boýunça XXI Halkara Žautykow olimpiadasyna 15 döwletden 700-den gowrak mekdep okuwçy gatnaşdy.

Umumy topar hasaby boýunça Türkmenistan 8-nji orna mynasyp bolup, okuwçylaryň tejribe başarnyklarynyň we ukyplarynyň ösmegine, häzirki zaman nazary we amaly bilimleriň, şeýle hem ylmy dünýägaraýşyň kemala gelmegine gönükdirilen okatmagyň usulyýetiniň yzygiderli kämilleşýändigini ýene-de bir gezek tassyklady. Bu bolsa Hormatly Prezidentimiz tarapyndan tassyklanan “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasynda” öňde goýulan wezipelere laýyk gelýär.

Mekdep okuwçylary BMG-sy tarapyndan yglan edilen 2025-nji “Halkara parahatçylyk we ynanyşmak ýylynda” hem-de Türkmenistanyň bitaraplygynyň 30 ýyllyk baýramçylygyna gabat gelýän ýylynda Kawkazyň matematika olimpiadasyna, Halkara Mendeleýew himiýa olimpiadasyna, 42-nji Balkan matematika olimpiadasyna, 66-njy Halkara matematika olimpiadasyna, Aziýanyň 25-nji fizika olimpiadasyna, 55-nji Halkara fizika olimpiadasyna, Daşkendiň halkara matematika olimpiadasyna, Al-Horezmi adyndaky matematika boýunça halkara olimpiadasyna, Ýewropanyň 9-njy fizika olimpiadasyna, Halkara himiýa olimpiadasyna, Halkara biologiýa olimpiadasyna, Informatika boýunça halkara olimpiadasyna, Astronomiýa we astrofizika boýunça halkara olimpiadasyna we beýleki halkara bilim bäsleşiklerine işjeň gatnaşyp, halkara arenada Türkmenistanyň abraýyny mundan beýläk-de ýokary göterjekdiklerinde ynandyrdylar.

Şeýle-de okaň:

Türkmenistanyň mekdep okuwçylary Matematika, fizika we informatika boýunça XXI Halkara Žautykow olimpiadasynda üstünlikli çykyş etdiler

Türkmen mekdep okuwçylary Matematika, fizika we informatika boýunça Halkara Žautyk olimpiadasyna gatnaşýarlar

ORIENT news

Foto: orient.tm